Aizawl: NEDP sum hmuh Rs. vbc 7 senga sak, Zarkawt Community Hall chu Inrinni khan Chief Minister Zoramthanga’n a hawng.
Thusawiin Chief Minister Zoramthanga hian Congress kaihhruai sorkarin a sakna tur sum ruahmana bul a lo tan tawh Zarkawt Community Hall changtlung tak hawn theih a ni ta chu lawmawm a tih thu a sawiin, khawtlang tana tangkai tak a nih ngei theih nan duhsakna a hlan.
Zoramthanga hian Mizote vanneihna chu ‘community’ anga inhlawm fel taka awm hi a ni tiin, mipui an inphuarkhawm that hian ram leh hnam a tichak tih sawiin, “Chumi tur chuan kan inhmuh tam a inkhawm tam a pawimawh a. Heng community hall kan hman tangkai dante hi kan hnam ziarang pawimawh tak lanchhuahna a ni,” a ti.
Zarkawt Local Council Chairman Lalawmpuia’n hall hawn puala inkhawmah a kaihhruaiah hian C. Lalmuanpuia, MLA leh Hachhek bialtu MLA, Lalrindika Ralte te an tel.
Zarkawt Community Hall sa tur hian Suvidha Infrastructure, Upper Khatla, Aizawl chu contractor-a thlan a ni a. October 4, 2018 khan sak tan niin kumin January 31 khan zawh fel a ni.
Hall hi chhawng ngaa sak niin chhawng tin zau zawng belhkhawm hi 1,382.80 Sq.m a zau a ni a. Chowkidar quarter, multipurpose hall pahnih, lirthei dahna leh badminton court hnih a awm bawk.