Rahul Gandhi-a’n hlawhtling taka Bharat Jodo Yatra a kalpui hnuah Congress chuan khawchhak lam atanga tana khawthlang tawp thleng turin kawng zawh a huaihawt leh dawn.
An party general secretary, Jairam Ramesh chuan Pathianni khan Pasighat-to-Porbandar yatra kalpui an tum hi a puang a ni.
Ramesh chuan nikum September thlaa tana kumin January thleng, km 4,000 dawn, Gandhi-a kaihhruaia Kanyakumari-to-Kashmir kea kawng zawh khan an worker-te tiphurin chakna a siam nasa hle tih a sawi.
Ramesh chuan khawchhak atanga khawthlang kea kawng zawh hi Arunachal Pradesh-a Pasighat atanga bul tanin Gujarat-a Porbandar-ah a tawpna hmang turin an inruahman tih PTI a hrilh a. Bharat Jodo Yatra nen erawh an kalpui dan tur a dang hret dawn tih a sawi thung.
“Phurna leh chakna min pe nasa a, a mi mal tak pawhin kei hian tul ka ti a; mahse, khawchhak atanga khawthlang pan erawh chhim atanga hmar pan dan nen erawh a kalhmang a inang lo hret hmel,” a ti.
Bharat Jodo Yatra-ah kha chuan a ram thleng leh hmunhma te, kalkawngte pawh a tha a, tun tuma mi tur erawh chutiang ang vek a nih loh thu a sawi.
Kea kawng zawh liantham tak a ni dawn a; mahse, a kawngah ramhnuai leh lui a tam bik tih a sawi a. “Multi-modal yatra (kea kal ngar ngar ni lova hmanraw dang hman) a ni dawn a; mahse, a tam per chu kea kal a ni ang,” tiin Ramesh chuan a sawi.
Karnataka-ah April-ah inthlan a awm dawn a, June atangin fur a intan dawn a, November-ah state inthlan a awm leh dawn a. Heng thlir chung hian yatra hi June hma emaw, November hma emawa an tan tur thu a sawi.
Ramesh-a chuan tuna kawng an zawh tur hi Bharat Jodo Yatra aiin a hun chhung pawh a rei dawn lo tih a sawi bawk.
A hun tur leh an kawng zawh tur chin chu reilo te hnuah tihfel a ni dawn tih a sawi bawk.
Congress hian Zirtawpni atang khan Chhatisgarh-a Raipur-ah plenary session an nei a, Pathianni khan an tawp a. A tawp niah hian Gandhi chuan thu sawiin Bharat Jodo Yatra avanga phurna leh hlawkna an neih laiin ruahmanna thar neih a ngaih thu a sawi a. Ram pum an telna tur leh thil dang tih a ngai tih a sawi a ni.