AZL: All India Congress Committee (AICC) 85th Plenary Session, Rajyotsav Ground, Raipur-a a neihah MPCC President Lalsawta chu thut khawm pawimawh bikah telin, Inrinni-a vantlang inkhawmah India ram Congress hruaitu langsar thusawina hun pek zingah thusawi tura sawm a ni.
He hunah hian Lalsawta chuan India ram state dangte pawhin an entawn tham Mizoramah sorkar tha din a tum thu te, chutiang turin Mizoramin mipui tha tak an neih thu te, Pathianin ram tha tak a pek thute a sawi a. Kumin 2023 inthlanah pawh Congress party-in sum tha chakna chhut chah a tum thu leh sorkar ngei an tum thu te, Congress sorkarah ram mipui an retheih laia ram roreltute an hausak thur thur a rem ve loh tur thu te a sawi.
AICC 85th Plenary Session-ah hian Mizoram atangin president bakah AICC member – KS Thanga, GS i/c AICC, MPCC; Dr. Lallianchhunga, GS & Spokesperson; Vanlalawmpuii Chawngthu, President, Mahila leh Dr. Lalmalsawma Nghaka, President, MPYCC-te an tel a. State hrang hrang atangin AICC member mi 15,000 vel an kal khawm a ni.
He hunah hian resolution eng emaw zat chhawp chhuah niin Congress Working Committee chungchang leh kum 2024 Lok Sabha inthlan lo awm tura hmachhawp hrang hrangte ngaihtuah a ni a. Congress hruaitu boral te sunna hun neih a niin PC Zoram Sangliana (L), AICC Member, Ex-Minister pawh sun zingah a tel a ni.