La Liga champion lai Real Madrid in kuminah an lallukhum humhim turin kawng an zawh a hautak belh dawn a. Inrinni zanah Atletico Madrid chuan tlem zawk chungin 1-1 in an chelh.
Santiago Bernabeu-ah Madrid khaw club pahnihte inkhel a hautak a, nidanga club pahnihte inkhel ang thovin boruak pawh a sang.
Second half-ah Atletico attacker Angel Correa chuan Antonio Rudiger a nghawk luih avangin red card a hmu a. Tlem zawk an nih hnu lawkah Rojiblancos in goal an khung thung.
Minute 78-naah Antoine Griezmann-a freekick chu Jose Gimenez chuan a tauh lut a, tlem zawk Atleti in hma an hruai.
Nimahsela Real Madrid pawhin set piece atang bawkin goal an khung ve a. Rawlthar Alvaro Rodriguez chuan Luka Modric corner pet a tauh lut a. Goal a khung avang hian kum zabi 21-na a Madrid derby a goal khung thei naupang ber a ni.
Real in point an hloh avangin Barcelona in nizana Almeria an hneh chuan point 10 in hma an hruai thei.
Hetihlai hian Atletico Madrid manager Diego Simeone chuan a club hi inelna hrang hranga vawi 612 a enkawlna a ni a. Luis Aragones-a record a tluk chiah.
Simeone chuan red card an hmuh chu a sawisel a. “Red card an inpekna kha engmah intihfuhna a awm lo. Rudiger hi palian a ni a, na ti lutuk ni awm takin a ding thei lo zui a, mahse a hnu lawkah a tlan a, a pangngai leh vek.”
“Yellow card pekna chu a ni thei. Mahse khatianga kan inhnawtchhuak a nih chuan inkhel tur an awm lovang.” a ti.