Aizawl: MJA Hnahthial District-in Annual Conference hmangin an mamawh tak, Information & Public Relations Officer leh thawktu dahsak thuai turin Mizoram sorkar an ngen.
Hnahthial district hian district MJA an nih hnua a vawi khat nan Hnahthial South III VC House-ah Annual Conference an hmang a, Hnahthial District Addl SP Bijoy Gurung chuan khuallian niin a hmanpui a. Thu sawiin journalist-te hi ram siam thatu, thil dik lote siam that a nih theih nana hma latu an nih thu a sawi a. Tuna an thlen chinah lungawia tawp mai lovin theihtawp chhuah chhunzawm zel turin journalist-te a chah.
MJA Hnahthial District President F. Zosangliana kaihhruai conference-ah hian Hnahthial South III VCP K. Lalremliana pawhin thu a sawi bawk.
MJA Hnahthial District chuan Mizoram sorkarin Hnahthial district a tipuitlin chu lawmawm an tih thu an sawi a, tun dinhmunah an mamawh tak, Information & Public Relations Officer leh staff dahsak thuai turin an ngen a. Hun rei tak Information & Public Relation Department ram an lo humhalhah hian Information & Public Relation Department Office leh Quarters saksak thuai turin an ngen a ni.