February 6-a Turkey rama lirnghingin chenna in tam tak a sawi chhiat chhuina kal zelah mi 600 chuang thu zawh fiah tawh an ni tih sorkar chuan a sawi.
Justice Minister Bekir Bozdağ chuan Inrinni khan mi 184 rinhlelh an awm thu a sawi a, an zingah hian in satu (construction contractor) leh in neitu an tel thu a sawi a. Heng mite hi an man tawh hlawm tih a sawi.
Kum tam tam liam tawh atang khan mi thiamte chuan ei rukna leh sorkar policy tha lo avangin in sak thar tam tak chu a him lo tih an lo sawi tawh.
Turkey leh Syria-ah hian lirnghing avanga thi chu mi 50,000 an chuang tawh a ni.
Bozdağ-a hian magnitude 7.8-a na leh a hnua na tak taka nghing nawn a thlenna hmun, Turkey chhimchhak lam atangin chhiatna thleng an chhuina dinhmun hi television kaltlangin a puang a ni.
An thil chhuiah hian huang zauh zelin chawlhkar hnih liam ta atang khan mi 113 man theihna lehkha (arrest warrant) an tichhuak tih a sawi.
Turkish chanchinbute chuan mi man zingah hian lirnghingin a sawi tanna bul vela khaw pakhat mayor pawh a tel tih an tar lang hlawm.
Lirnghingah khan Turkey-ah hian in 160,00 chuang chim leh chhia a awm a, khuarel chhiatna ni mah se mihring fimkhur loh leh inthlahdah vanga chhiatna thleng ti nasa zualtu a awm ngei nia ngaihna a lian hle a ni.
Eptu party-te leh in sak lama mi thiamte chuan President Recep Tayyip Erdogan-a sorkar chu in sak leh enkawl dan phung kengkawh tha lovah puhin chhiatna thlen chhan chu mi/thil danga puh daih tumah an puh.
Sorkar chu in sak danah felhlel awm mah se pawmzam mai zelah an puh a. Lirnghing thlen mai theihna hmunah pawh in sak lama hmalak vak vakna kalpui tlatah an puh bawk.
Erdogan-a hian a hian lirnghing tuartute puih zung zung an theih loh thu chu a pha lo va; mahse, heti taka an tawrhnaah erawh a sorkar a puh lo.
“Hetiang thil hi chu a thleng fo va, nunphunga tel ve a ni,” tiin chhiatna thlenna a tlawh laiin a sawi.
Turkey-ah hian inthlan a hnai mek zel a, Erdogan-a hian kum 20 zet thuneihna a chan hnuah chan zui a la tum a; mahse, tuna an ram chhiat tawh hian a dinhmun turah nghawng a neih ngei rinna a lian hle.