Jammu & Kashmir-a Line of Control (LoC) hrula India leh Pakistan ramten inkahhai an puan chuan kum hnih a tling ta a, a kum thumna a kal tan mek a. Kum hnih liam ta chhung hian heng lai hmuna kum tam tak hriat tawh loh, muanna chuan thla a zar nasa hle.
India leh Pakistan inkar hi a chhiain ramri-ah inkahna a thleng reng reng thin a. Inkahhai khauh tak puan hnuah erawh khawi lam ve vea chengte pawhin nun zalen zawk an chen ve thei ta a, tun hmaa silai puak ri leh in chhia tih thawm hriat tur awm reng kha a bo ta.
A khawi lam ve ve-ah pawh, Jammu & Kashmir-ah hian kum hnih chuang chu ram hnih sipaite inkahna avanga thi an awm tawh lo va. Sipaite pawhin a ruka ramri kân tum an nanchin zat pawh a lahniam duai duai bawk.
Ramria thil thlengte hi a danglam dawrh tih theih a ni a. Kum 2020 khan inkahhai puan mek bawhchhiaa inkahna hi vawi 5,000 vel thleng anga ngaih niin thihna leh chenna in chhia awh a tam hle a. Hetih lai hian kum hnih liam ta chhung erawh chuan inkahhai bawhchhiatna a awm lo tih theih a ni.
February 25, 2021-a India leh Pakistan sipaite inkara inkahhai khauh zawk puan a nih hnuah chuan a bawhchhiatna, chu pawh a tenau deuh vawi thum chiah a thleng tih thuneitute chuan an sawi.
LoC-a sipaite inkar chu ziaawm hle mah se drone hmanga ralthuam leh ruihhlo tawlhruk tumna erawh a la awm reng a, hengte hi a tlangpuiin Jammu huam chhunga thleng a ni a. Sipaite chuan drone hmanga chet tumna veng thei tur hmanrua pawh an chhawp phah.
Drone hmanga ramri kân hi a tam zawk chu Kathua, Samba leh Jammu district-a international border (IB)-ah a ni tlangpui a. IB hi LoC nen a inang lo va, sipai pangngaiin veng ve lovin Border Security Force (BSF)-te ven lai hmun a ni.