Italy chhim lam tuipui fawn nasa taka khat taka an chuanna lawng pilah ram dang atanga pem, nausen telin mi 30 chuang an thi a, eng emaw zat chhan chhuah an ni bawk.
Calabria region-a vaukam khua, Crotone kai an tum laiin an lawng hi a phel a, mi 100 chuang an chuang a ni.
Ruang eng emaw zat chu tuipui kama resolt bulah chhar an ni.
Italy-ah hian kum tin Africa khawmualpuia ram buai leh retheihna tlansan tumin mi tam tak an pem lut thin.
Tun tuma chhiat tawkte lawng hi khawi ram atanga chhuak nge tih hriat mai theih a la ni lo va; mahse, Adnkronos news agency chuan a mi chuangte hi Iran, Afghanistan leh Pakistan-a mite an ni hlawm tih a tar lang.
Lawng hian khaw chhe tak hnuaiah lungpui suin a keh ta niin news agency hian a tar lang bawk.
Italian thuneitute chuan khawmual leh tuipuiah zau takin mi zawn leh chhan chhuah hna an thawk nghal.
Thi hi mi 30 an tling tawh niin Calabria-a kangthelh pawl thupuangtu, Danilo Maida, chuan a sawi a. “Thi zinga tam tak hi pem tum nia sawi an ni a, mi 40 chuang an dam chhuak bawk,” tiin national firefighters department chuan Telegram messaging app-ah an tar lang.
“Khawmual chu an kai ngei a; mahse, hetianga chhiatna hi a la thleng ngai lo,” tiin Cruto Mayor Antonio Ceraso chuan Rai News a hrilh.
Nikuma an thlan tlin laia an rama pem lut tam lutuk tihtlem tuma intiamtu, Italian Prime Minister Giorgia Meloni chuan ‘pawi tak zet’ a tih thu leh a zin chhuahtirtute a dem thu a sawi.
“Mipa, hmeichhia leh naupangte hnenah him taka an zin theih tiamin ‘ticket’ an pe thin a, a mihring zia lo hle a ni,” a ti.
Meloni-i sorkar hian Italy vaukama pem lutte an kai lohna turin hma a la a, chhiat an tawha chhanchhuah hna an thawhnaah pawh dan khauh zawk a zam thar a ni.
Zirchiangtute chuan kum 2014 atang khan Mediterranean Sea lailiah hian mi 20,000 chuang thi leh bo an awm tawh thu an sawi.