Mannfred Z. John, Nicholas Z. John leh Ramthansiama ten thuchhuah siamin, Johnson Garden-ah zu an zuar lo niin an tar lang.
An thuchhuaha tar lan danin February 23, 2023 (Ningani) khan Assembly House-ah MLA Zodintluanga’n Johnson Garden Restaurant (Zuangtui piah Muanna Veng Go-Down pelh kawngthlanga mi) hi thu dik lova puh hmingchhiat tumin, whisky, wine leh rum duh tawka lam tur awm thin angin a puh a ni.
Thu dik lo leh belhchian dawl lo, finfiahna sawi tur engmah nei lova MLA-in Assembly House chhungah a puh hi an hrethiam loin, an la na hle tih an tar lang a, “Mizo thalai entrepreneur, mahni kutkawiha eizawnna daptute min fuih (encourage) zawng ni lova thu dik lo hmanga kan rilru tina leh tihnual zawnga kan ram hruaitu atana thlan a tawng chhuak mai hi Mizo thalaite tan a pawi tak zet a ni,” an ti.
Johnson Garden-ah hian engtik lai mahin zu an zawrh ngai loh thu leh, sorkarin phalna neite tana zawrh a phal, Mizoram tharchhuah grape atanga wine siam tak ngial pawh an zuar ngai lo niin an sawi a. Finfiahna nei si lova hetianga min puh mai hi an sumdawnna a tihchhiatsak tumna a nih bakah, Assembly House leh member zahawm tak takte zah lohna lian tak, mipui hmuhsitna tling a nia an hriat thu an tar lang bawk.