Hmasawnna hnathawh tam tak a awm a, la thawh zel tur pawh tam tak a awm bawk. A hlawkpui leh a hlawkna tel phate tan chuan sumah buaina a awm lo a ni thei. Mahse, mipui lam tan zawk hian harsatna nasa zawk hi a thlen zel a hlauhawm hle.
Kan ram sum dinhmun lah chu a chhe zel a, Aizawl North leh South Treasury an che hlei thei lo fo a, sorkar laipui lahin state tana hamthatna a rawn pek te lah chu state sorkarin a hman hek theih miah lohna turin thupek khauh tak a rawn chhuah khum thul; a nihna tur taka hman nghal zel tura tih a ni bawk.
Hetiang kan ni tawh chung hian kan ram hruaitute lah chuan hmabak pui tham tak tak an la sawi reng a, an rilru a la hah ve eih lo nite pawh hian a hriat thin. Kan finance minister ber pawh a la mangang eih lo niin a hriat bawk a, kan ram hian hun thim kan tawng chho ang tih a hlauhawm tak zet.
Mi ramin sum leh paia chhiatna nasa tak an tawh avangin tlakchhiat lam an pan a, an buai a, rorelna sang thlengin a nghing a, kan lo hre ve zel bawk nen. Chu’ng mite dinhmun chu kan hlat lo ta hle. Mi thiam leh hre zawkte lu a hai a, an mangang a, rorel thiam lo sorkar kan hrawn emaw ni chu aw, a tih ve theih rum rum ta mai.