Haryana sorkar chuan Pathianni khan tun hnaia Rajasthan tlangval pahnih, bawng thlavang hauhtu nia puhten ru bova an thah duh lohna lantir kal zelah Nuh district huam chhungah ni thum chhung mobile internet leh SMS service tihtawpna tur thupek a chhuah.
Khuahkhirhna thupek hi Pathianni atanga tanin Thawhlehni zanlai thleng a ni dawn a ni.
Rajasthan-a Bharatpur atanga bo, a hnua Haryana-a Bhiwani-a lirthei kang chhe vek chhunga an ruang kang chhia hmuh takte thattu man chhuah ngei phutin Zirtawpni khan Firozpur Jhirka-ah mipuiin Nuh-Alwar highway an dangchat a. Hemi hnuah hian Nuh-ah pawh venhimna khauh taka kalpui zui a ni.
Internet tihtawp leh SMS thawn theih loh hi social media hrang hrang – Whatsapp, Facebook Twitter leh a danga thu dik tawk lo thehdarh venna tur a nih thu hriattirnaah chuan tar lan a ni.
Zirtawpnia kawngpui danah hian lirthei an tang nasa hman hle a; mahse, darkar khat hnu velah police-in an titlang thei hlauh thung.
Nuh-Alwar highway dan a nih hnuah hian Nuh district-ah hian duh lohna lantir tuma ruahmanna dang siam mek a ni.
Rajasthan-a mi, Nasir leh Junaid te hi February 15 khan bawng thlavang hauhtu nia puhten an ru bo nia sawi a ni a, a tukah Haryana-a Bhiwani district, Loharu khuaah an lirthei kang hmuh niin a chhungah an ruang pawh a lo awm a ni.