Member 60 awmna Nagaland assembly-a thu tur chu Thawhtanni hian thlan an ni dawn a, inthlan chuh tumte dinhmun zirchiannaah chuan NDPP-BJP candidate zinga 87% zet chu cheng vaibelchhia nei tling an ni.
Kum 2021 atanga eptu tumah an awm lohna, Nagaland inthlan turah hian chuh tur zinga mi 116 chuan Rs. Vaibelchhe 1 chuang pawisa an nei tih an affidavit thehluhah an tar lang a, inthlan hnuhnung ber aiin mi pahnihin an tam zawk.
NDPP-BJP tang dun atanga chuhtu mi 52 chuan Rs. Vaibelchhia 1 chuang an nei tih an insawi a, party pahnih atanga chuhtu 87% chu crorepati tihna a ni.
Chuhtute hausakna chawhrual hi Rs. Vaibelchhe 5.13 an ni a. Kum 2018 inthlanah kha chuan candidate pakhat zelin Rs. Vaibelchhe 3.76 nei ang an ni thung.
Rs. Vaibelchhe 160 chuang neitu, Lok Janshakti Party (Ram Vilas) hminga Pughoboto biala chuhtu, Dr Sukhato A Sema chu hausa ber a ni.
Chief Minister Neiphiu Rio chu candidate zinga hausa ber dawttu niin Rs. Vaibelchhe 46 chuang a nei.
Congress candidate, Phomching biala chuhtu, T Ngampai Konyak chuan Rs. 5,251 chauh pawisa leh thil dang a nei a, chuhtu zinga rethei ber a ni.
Kumin inthlan turah hian chuhtu mi 53 chu a hma lama inthlan lo chuh tawh an ni hlawm a, an zinga mi 36 chu NDPP-BJP tang duna mite an ni.
Kum nga liam ta chhung khan heng mi 53-te hausakna leh thul neih hi 30% zeta pungin tunah hian Rs. Vaibelchhe 7.10 zel pakhatin nei ang an ni.
Tamlu biala NDPP aiawha ding, BS Nganlang Phom chuan kum 2018 inthlan dawn khan Rs. Nuai 21.91 nei angin a inchhal a, tunah erawh Rs. Vaibelchhe 15.05 zet nei tawhin a hausakna hi 6,870% zetin a pung tihna a ni.
Inthlan chuhtu mi 184 zinga pasarih chuan thubuai an nei mek tih an affidavit-ah an tar lang hlawm a. Kum 2018 kha chuan chuhtu mi 193 zinga pathum chauhvin thubuai an nei.
Tun tum inthlan turah hian chuhtu zingah hmeichhia pali chauh an awm a, an zinga pahnih hi NDPP niin BJP leh Congress ten pakhat ve ve an nei a. Kum 2018 khan mi 193 zinga panga chu hmeichhia an ni a. Nagaland-ah hian kum 1963 atanga state inthlan an neih tawhah hmeichhe MLA an la awm miah lo bawk.