Italy-ah league hmahruaitu Napoli dinhmun a tha fal a, Inrinni zanah point 18 a hma hruai fal turin 2-0 in Empoli an hneh.
Stadio Carlo Castellani-ah Napoli hi mikhual team niin an striker chhuanvawr Victor Osimhen chuan minute 28-naah goal a khung a. Hemi hma hian Napoli winger Khvicha Kvaratskhelia thawhrah atangin Empoli defender Ardian Ismajli chuan own goal a nei bawk.
Luciano Spalletti pawlte hian league inkhel hnuhnung pali chhung goal an veng him tawh tihna a ni a. Point 65 hmu tawhin umphak an beiseiawm tawh lo hle.
Empoli hi an inkhel hnuhnung panga chhung chak hmel hmu tawh lo an ni a, an defender Mario Rui chu second half-ah hnawhchhuah a ni bawk.
Napoli goal khungtu Osimhen-a’n second half-ah offside avanga goal pawm loh a nei bawk a. Serie A inkhel hnuhnung pariat a hmachhawnah goal a khung vek a. Cristiano Ronaldo hnua Italy a league sang ber a hetiang ti leh thei hmasa ber a ni.
Napoli coach Spalletti chuan, “Tupawhin min hmachhawnin thih tha nen min beih an tum thin. Heti chunga hetiang zata hma kan hruai thei hian kan team in kan rilru puthmang ni tur tak kan hrethiam a, kan mawhphurhna kan pawm tlang a ni tih a tilang.” tiin a team a fak.