Tuichangral VC Association office bearer-ten Inrinni khan Chekawn – Artahkawn kawng black top tura hnathawh tan mek an tlawh.
Tuichangral VC Association hruaitute chuan kawng siam hna thawktu, SLT Infrastructure hotute chu hmanraw tha chauh hmang tur te, kawng tha leh rotling siam tura theihtawp chhuah turtein an ngen a. Kawng siam mek chu an vil zel tur thu leh hmanraw tha lo hmanga kawng chu siam a nih chuan hma an lak tur chu te an hrilh.
Chekawn – Artahkawn kawng black top siam mek hi Special Assistance to States for Capital Investment (SASCI) sum hmanga siam niin, Rs vaibelchhe 6.58 senna tura ruahman a ni.
Tuichangral VC Association hi E. Lungdar RD Block huam chhunga khaw 12 – E. Lungdar, Leng, Sailulak, Mualcheng, Bawktlang, N. Vanlaiphai, Lungkawlh, Sialsir, Lungchhuan, Chekawn, Khawlailung, Piler khuate infinkhawmin an din a ni.