Aston Martin chuan hliam avanga pre-season test a an car khalh ve thei lo Lance Stroll chu tun Pathianni a Bahrain Grand Prix-ah a intlansiak thei dawn lo a nih chuan reserve driver Felipe Drugovich chuan a ai a awh tur thu an tichiang.
Tun kartawp khan season liamta a Formula 1 chawlhsan thu puang, an driver hlui, vawi li world champion ni tawh Sebastian Vettel chu Stroll aiawh turin a lo kir leh mai thei nia sawi thawm a awm a. Hei hi team principal Mike Krack pawhin a sawibo duh lo.
Nimahsela Pathianni khan team in thutlukna an siam a. Kum 22 mi Brazilian driver Drugovich hian Stroll a la dam hman loh chuan a thlak tur an tichiang a. Kar hmasa a pre-season testing-ah pawh Stroll hi thlakin an car hi a lo khalh tawh.
Stroll hi kar hmasa khan cycle-a a chetsual avangin a ban a ti na a, a hliam hi na tak ni lo mahse car a la khalh thei lova. Tunkarah a inlan thei ang em tih endikin team hmunpuiah ‘simulator’ khalh tir a ni ang.