- Ruata
Hyundai Motor India Limited chu 2023 Alcazar SUV tichhuak turin an in ruahman mek a, tunah hian booking pawh an hawng tawh a, he SUV rawn chhuak thar leh turah hian 1.5-litre turbocharged petrol khawl thar kan hmuh hmel a ni.
Hyundai Alcazar hi Hyundai Creta chung chiah tih te pawhin Hyundai line-up angah chuan a sawi theih a. A thutna tlar thum awm, Creta te aia lian hret SUV a ni a. A design pawh a mawi a, Mizoramah ngei pawh lei an awm nual tawh a. Mihring a phur tam theih hret bakah Creta aiin a chhung a lian a, mamawhtu tan chuan SUV tha leh mawi, changkang bawk si a ni. He 2023 model lo chhuak tur hi tarlan tawh angin a book theih tawh a. Rs. 25,000 chawiin online emaw dealership kaltlangin emaw a book theih tawh a ni.
Tarlan tawh angin kum 2023 model, Alcazar-ah hian turbo khawl thar, 1.5-litre turbocharged petrol khawl kan hmu dawn a. Hei hi company lam pawhin an puang chiang tawh a. He khawl thar hian tuna Alacazar-a kan hmuh, 1.4 litre turbo petrol khawl hi a rawn thlak dawn a. Creta line-up-ah pawh 1.4 litre turbo khawl hi chu hman a ni tawh lo a. Hyundai Alcazar tharin a hman tur 1.5 litre T-GDi 4 cylinder khawl thar tur hi Verna thar lo chhuak tur new-gen Verna-ah pawh kan hmuh hmel a ni.
1.5L turbo engine hi RDE (Real Driving Emission) mila duan a ni a, hei hi E20 fuel mil a ni bawk a. He khawl hian 160PS power chu 5,500rpm-ah a pechhuak thei a, torque lam pawh 253Nm chu 1,500rpm leh 3,500rpm inkarah a pechhuak thei a ni. Transmission lamah chuan 6-speed manual leh 7-speed dual-clutch transmission or DCT te a nei dawn bawk a ni.
2023 Hyundai Alcazar, 1.5L turbo petrol leh DCT hmang hian certified fuel economy an chhut danah chuan petrol litre khatin km 18 a tlan thei dawn a. Manual version ARAI-rated fuel economy ang chuan km 17.5 a tlan thei thung a. He SUV hian diesel khawl lamah chuan 1.5-litre diesel khawl, 4,000rpm-a 115PS power leh 1,500-2,750rpm-a peak torque 250Nm pechhuak thei a hmang dawn bawk a ni.
2023 Hyundai Alcazar hi tuna chhuak nen thildangah chuan a inang deuh reng dawn a. A chhuak thar turah hian airbag paruk, Electronic Stability Control (ESC), Vehicle Stability Management (VSM), Hill Start Assist Control (HAC) leh a ke pali-a disc brake vek te a hmang dawn a. He SUV thar tur hian idle start & Go function chu a tui heh lohna hmanrua atan a hmang dawn bawk a ni.
Tarlan tawh angin Hyundai Alcazar hi mihring phur hnem thei SUV chuan nuam leh lian tha tak a ni a. Kum 2023 model-a an rawn update leh tur hi thil tha tak mai a ni a. Market lamah pawh hei hian Hyundai tan nghawng tha tak a neih a beiseiawm a. A leitu tur mipuite tan pawh thiltha tak a ni awm e. An tlangzarh hun tur hi sawi chian a la awm lo a, company lam lo ngaihchan rih a ngai dawn a ni.