Ei rua puh avanga India khawpui, Delhi-a rorel lai party hruaitu lawk tak man duh lohna lian tak chu a party mi leh saten Thawhtanni khan an lantir.
Delhi Deputy Chief Minister Manish Sisodia hi Pathianni khan sorkar laipui hnuaia awm agency-in khawpuia zu zawrh dan policy kalpuiah dan pela thil tia puh a nih avangin a man.
Amah leh a telna, Aam Aadmi Party (AAP) chuan dik lo leh fel lo, dan pela tih engmah a nei lo niin an sawi thung.
Sisodia-a hi Thawhtanni khan court-ah inlantir nghal a ni.
CBI chuan Sisodia-a hi Delhi-a liquor police kalpui dan an chhuina kaihhnawihah a man tih an sawi a. Policy hnuaiah hian zu dawr hawn thar a ni nual a; mahse Delhi sorkarin a scheme hi a tihtawp leh hnuah khar leh a ni hlawm.
“Finfiahna tling tak anga lang kan hai chhuak chungin min chhang tha duh lo va, a chhui hna thawhnaah min pui tha duh lo,” tiin Pathianni khan an sawi.
Hetih lai hian AAP chuan Sisodia-a hian tih dik loh a nei lo tih an sawi a, man a ni chu ‘politics bawlhhlawh tak khelhna’ a nih thu an sawi bawk.
CBI hian BJP kaihhruai, Prime Minister Narendra Modi-a sorkarah thu an thlen a, BJP hi Delhi sorkar bikah eptu party lian an ni ve thung.
AAP chuan a party hmunpuiah duh lohna an lantir a, CBI court leh BJP hmunpui pana kawng zawh an tum a. Video-a a lan dan chuan police-in dan tumin an bei a, thenkhat chu an hreng nual a. Sisodia-a man duh lohna au thawm hriat tur pawh a awm.
Khawpuiah hian hmun hrang hrangah police dah an ni a, kawngpui eng emaw zat khar a ni bawk.
AAP rorelna state, Punjab khawpui, Chandigarh-ah pawh an mi leh sate chuan Sisodia-a man demna leh a lam a tang tih lantirna huaihawt a ni a. Bengaluru, Mumbai, Bhopal leh khawpui lian dangah pawh huaihawt a ni bawk.
Delhi-ah hian thil hrang hrang avangin AAP leh BJP hi an lo inchaltauh fo tawh thin a. BJP hian ei ru-ah AAP chuan an puh thin a, AAP hian Modi-a sorkar hian an hnuaia awm agency hmangin an hnathawk tluang leh tha tihkhaihlak an tum niin an puh let ve bawk.
Nikum khan Delhi Health Minister Satyendra Jain chu sum chheprelha puhin man a lo ni tawh a, court-in bail a dilna a hnawlsak avangin tunah pawh a la tang mek.
AAP hi kum 10 chuang awrh kal taa ram chhunga ei rukna nasa lutuk do tura bul tana politics-a lut an ni a, an huat leh do ber ti ve ta anga lang leh puh an ni hi an tan chuan a thanatthlak hle.
Delhi leh Punjab-a thuneihna an chan hnuah huang zauhva BJP khingtu lian ber nih tuma hma la mek an ni a, kumina state inthlan awm tur hrang hrangah pawh chuh ve an tum hlawm.
Sisodia-a hi darkar riat vel zel CBI hmunpuia thu zawh fiah a nih hnuah Pathianni zana man kha a ni a. CBI pisa a kal hma hian AAP mi leh sa thenkhatte nen Raj Ghat-a Mahatma Gandhi hriatrengna hmun siam an tlawh hmasa.
Thu a sawinaah ‘thla sarih, thla riat vel a tan theih’ thu sawiin chutih chhung chuan a chhungte chu lo enkawl tha turin a party worker-te chu a chah.
Man a nih hnuah Delhi Chief Minister Arvind Kejriwal-a chuan, “Manish, i chhungte chu tha takin kan lo enkawl ang, lungngai miah suh,” tiin Twitter-ah a tar lang zui.