Barcelona in La Liga a hma hruai fal theihna hun nei mahse an chhawr tangkai lova. Almeria lakah rin loh takin 1-0 in an tlawm.
Power Horse Stadium-ah mualneitu Almeria hi first half a kheltha zawk an ni a. Minute 24-naah goal khung zawkah an tang. Luis Suarez chuan ball duhthusam El Bilal Toure tan a pe a, Malian striker in Barcelona goal-ah chiang takin a khung.
Barcelona goalkeeper Marc-Andre ter Stegen chuan Leo Baptistao goal khung tur a dansak bakah Rodrigo Ely chuan goal hma zawn atangin hmun leh hmunah a khung lo bawk.
Almeria hian a zawna league inkhel vawi sarih a hnehna chang tawh Barcelona kaltluang lai an titawp a. Catalan club hi inelna hrang hrangah a zawna vawi 18 an tlawm loh hnuah Manchester United leh Almeria lakah an tlawm zawn tihna a ni.
League-ah point sarih in pahnihna Real Madrid lakah an la sang mek tho.
Barcelona manager Xavi Hernandez chuan, “Kan result vang hian ka thin a ur hle. Tun season a kan khelhchhiat ber niin ka hria, a bikin first half-ah kha a ni zual.”
“Kan thiltih reng reng kha a tha tawk lova, huntha kan khawhral nasa a. Remchang kan neih hi chhawr lo fo thei kan ni lo.” tiin a sawi.