Principal Distribution Centre (PDC) Lunglei atangin centre pasarih – Change, Tlabung, Lungsen, Tuichawng, Putlungasih, Borapansury leh S. Vanlaiphai-ah te fur atana inbuatsaih lawk nan Buhfai pechhuak turin order tihchhuah tawh a ni.
Lunglei DCSO Carolyn LB Khiangte-in Lunglei District disaster management authority (DDMA) thutkhawmah fur lo thleng tur atana Buhfai khawlkhawm dan sawiin, Lunglei PDC atanga centre pasariha fur atana inbuatsaih lawkna atana Buhfai pechhuak tura order tihchhuah tawh a nih thu hi a sawi.
Lunglei DCSO chuan Borapansury atan thla 8 daih, Lungsen atan thla 4 daih leh a dang zawng tan thla 6 daih Buhfai pechhuak tura ruahman a nih thu a sawi bawk.
Lunglei DDMA thukhawm hian Lunglei khawpui chhung, NH-54, 302 leh kawngpui dangah te fura leimin hlauhawm a awm em tih enfiah lawk ni se, an ti a. Veng leh khawtina Village disaster management committee (VDMC) te chu hetiang hi an huam chhungah a awm leh awm loh DDMA-ah report tura hriattir ni se, an ti.
DDMA chuan Lunglei district-a khua leh vengtinah VDMC mumal taka kalpui pawh rawtin, hemi chungchangah hian khua leh veng tinah lehkha thawnin, VDMC mawhphurnate leh chetlak dan tur te hriattir ni se, an ti bawk a ni.