Thai drugs dealer chuan ‘Korean tlangval hmeltha tak’ anga a lan theih nan leh dan laka a him theih nan a hmaiah vawi tam tak plastic surgery a tih thu thuneituten an sawi.
Seong Jimin tia an sawi mai thin, Saharat Sawangjaeng-a hi kar hmasa khan Bangkok-ah man a ni.
Police-in thla thum an lo zawn tawh tlangval kum 25 mi hi a man meuh chuan ‘a hmel pangngai put alawi a nei tawh lo’ nia sawi a ni.
A hnu an chhuinaah Bangkok-a ruihhlo a pe kual leh zuar chhawng hnena a sem lai an nang fuh a ni.
An man lai vel hmutute chuan ‘Korean tlangval hmeltha tak’ niin an sawi a, a hming pawh Korean hmingin a thlak tawh a. Police-in a man lai video an thehdarhah chuan, “Korea-a pem ka duh, Thailand hi ka ning tawh,” tiin a sawi.
Saharat-a hi phal loh ruihhlo la luta puh a ni a. Ruihhlo chi khat, ecstasy an tih mai, MDMA pawh cryptocurrency hmangin website biru (dark web) kaltlangin a chah (order) tih amah pawhin a pawm.
Nikum pawh khan Saharat-a hi vawi thum vel man a ni a. Vawi khat chu mi kut a thlak avanga man a ni a, hemi tum hian ecstasy pill 290 leh ruihhlo tui chi kg 2 a lo kawl nghe nghe tih police chuan an sawi.
Hemi tum hian an hrenna hmun atangin a tlan chhuak a, chhuitute bum nan a taksa leh hmel lan dan a tidanglam zui ta a ni.
Thai Police Major-General Theeradej Thammasutee chuan Saharat-a hi ‘Bangkok-a MDMA a tam viau chhan bulpui pakhat’ tiin a sawi tih The Straight Times chanchinbu chuan a tar lang.
“Drug lord a ni a, kum 25 lek ni siin Europe atangin MDMA a chah lut a, ram pawn lamah pawh amah puitu an awm ngei a rinawm hle a, kan chhui zel ang,” a ti.
Video-a a lan dan chuan Saharat-a hian ruihhlote hi Netherlands atangin a chawlut thin a, he rama a dawr thin hi amah tak erawh a la hriat ngai loh thu a sawi thung.