“English mi maw? A va lawmawm em!” a ti a, George-a lam chu a hawi a, “He ramah hian i cheng hlen ve dawn em ni? England-a let leh i tum lo em ni?” tiin a zawt a.
George-a’n kan farm bul lawkah farm zau tak a lei tih leh South Africa-a inbenbel a tum thu a hrilh chuan a thaw huai niin a hriat a, a hmel chu a lo nung thar sawt a, George-a chu tui takin a titipui ta bawrh bawrh a ni.
Chutia ka ni Stephina leh George an inhmuh hnu chuan in te tak te chu kan kalsan a, kan farm chhunga vaimim hmun zau tak chu George nen kan fang dun a. George-a haw hnu chuan ka ni Stephina chu ka tlawh leh a, kum hnih hnuah inneih kan tum thu ka hrilh chuan a hmelah lawm lo hmel lian tak ka chhiar thei a, amaherawhchu ka nu leh pain kan ruahmanna chu tha min tihpui tih a hriat erawh chuan a thla a muan hmel leh deuh thung.
Ka ni Stephina hian George nen kan inkar hi a ngaihsak em em a, a chang chuan ka tana zawhna mak angreng takte min zawt leh thin a, a awmdanah chuan kan inhmangaihnaah thil duhawm lo engemaw a thlen palh a hlau ni berin ka hre thin.
Ni khat chu George-a’n kan inneih hmain England tlawh lawk a tum thu ka hrilh a, ka beisei loh tak maiin ka ni Stephina chu thinrim takin a te thawt a, “Kal suh se. Kaltir reng reng suh. I kaltir lo ang tih min tiam rawh,” a ti a, a taksate chu a khur dawt dawt a, a rilru nawmna turin theihtawpin ka hnem a, mahse a hmelah chuan a chauh hmel em em a, a hmel chu a dang vek a, a room-a mu hahdam turin ka ngen a, a tuka a ina tlawh leh ka tiam bawk a ni.
A tuka a in ka thlen chuan veranda-ah a lo thu chhuak a. A khawhar hmelin a hmel chu a khawngaihthlak em em a, a hmel ka en rual chuan a vawi khatna atan ka rilruah engatinge mipate’n nupui atan an sawm ve ngai lo em ni, engatinge pasal nei loa hetia a awm reng tih zawhna a lo lut a, mipate’n an hmangaih ve ngai lo em ni? Amah enkawl tur leh amah hmangaihtu an awm lo em ni ang? Ka nu min hrilh danin ka ni Stephina hi a nulat lai chuan nula hmeltha chungchuang a ni si a, tunah pawh a hmel upa tawh tak karah nu hmaifang tha tak a ni thin tih chu a hriat reng a, a mitmu buangah chuan lungngaihna thuk tak hmuh tur awm mahse chu mitmeng chuan tlangvalte rilru a la hneh em emin a rinawm si a, hmeichhe lian lem lo, te lutuk lo chu mipa tuemaw tal chuan an hmangaih ngei ngei tur a ni.
Ka ni Stephina chu a ngawi reng a, sawi tur tam tak a nei niin a lang a, a hmelah chuan sawi tanna tur ber a hre lo ni zawkin a lang.
Chutah thawk a han la hak a, a rilruah mawlhtu engemaw lian tak a awm niin a lang a, “I tel loa George-a’n England tlawh a tum ka duh lo viau hi mak i ti hlein ka ring a. I thiltawn hian hun kal tawha ka thil lo tawn min ngaihtuah nasattir zual a, hetiang lama ka thil lo tawn tawh hrilh che ka duh a, ka hrilh zawhah che i pasal hual i tel loa in inneih hmaa England-a kaltir a finthlak leh finthlak loh chu ngaihdan i siam dawn nia,” a ti a, a chanchin chu min hrilh ta a ni.
“Richard Weston ka tawn hmasak ber chuan nula chhuaktir chauh ka la ni a. Richard chu English mi a ni a, kan farm bul lawk, kan farm atanga mel li leh mel nga bawr vela cheng Van Rensburgs chhungkaw rualin England atangin a lo kal a ni. Mipa chak tak a ni lo va, a awm a chak lo va, doctor-in South Africa khaw lum leh ro a ngeih an ring a, an lo kaltir a ni. Van Rensburg fate lehkha a zirtir thin a, chung naupangte chu kei aiin naupang daih mahse kan infiam thin a, ani pawh kan infiamnaah chuan a lo tel ve thin a ni. (Chhunzawm tur)