Assembly session neih meka District Council & Minority Affairs Department Minister R Lalzirliana’n Autonomous District Council (ADC) chungchang a sawi danah lungawi loin nimin khan pawl hrang hrangin an dem thu an sawi a. BJP Mizoram Pradesh-in cabinet minister a nihna atangin chawlhtir an phut.
BJP Mizoram Pradesh hian R Lalzirliana chu cabinet minister a nihna atanga chawlhtir tura phutin nimin khan Chief Minister Zoramthanga hnenah ngenna lehkha an theh lut.
Ngenna lehkha an theh luhah hian R Lalzirliana’n mipuite tana rorelna sang, Assembly House-a ADC area-ah dawt thu hmanga vote zawng thin an nih thu a sawi khan sorkar leh Assembly House a timualpho hle niin an tar lang a. Mipui hmuhsitna nasa tak a nih avangin District Council & Minority Affairs etc., department enkawl zel tlakah an ngai lo tih sawiin, cabinet minister atang hian chawlhtir turin an phut a ni.
Central Young Lai Association (CYLA) pawhin thuchhuah siamin Mizoram Legislative Assembly budget session-a ADC chungchanga Mizoram sorkara DC&MA changtu R Lalzirliana’n ‘Lem kan va der mai mai a nih kha saw lamah khan, Congress-ah khan vote zawn nan kan va hmang mai mai a nih kha, anniho hian an lo awih ve em em a, kha chauh kha a ni, a ho tak tak a ni’ a tih hian ADC huam chhunga chengte rilru a tihnat thu an sawi.
CYLA hian R Lalzirliana’n ADC area-a cheng mipuite rilru tina zawnga thu a sawi avangin, he thu a sawina hmun Assembly House-ah ngei hian ADC area-a cheng mipuite hnenah ngaihdam dil tura an phut thu te, Assembly House meuha ADC area-a mipuite hmuhsitna lantir duhtu R Lalzirliana’n DC&MA a enkawl chhunzawm hi a chhunga cheng mipuite tana him tawk lovah an ngaih avangin, DC&MA enkawl tur hian mi dang ruat turin chief minister an phut.
An ngenna leh beiseina hi a tihhlawhtlin theihna tur leh ADC area-a cheng mipuiten hmasawnna an neih theihna turin Central YLA chuan hma an lak zel tur thu leh an ngenna hi a hlawhtlin loh chuan a tawp thlengin, na zawka hma an lak chhunzawm tur thu an thuchhuahah an tar lang.
Lai Students’ Association pawhin DC&MA dept. Minister R Lalzirliana’n a department enkawl hi a hre chiang lo hle nia sawiin, Assembly House zahawm taka dawt a sawi ta mai hi pawi an tih thu leh an dem thu an sawi a. “Keini ADC area mipuite zah lo tak leh hmusit taka Assembly House meuh a, a thusawi chungchangah hian ngaihdam dilna emaw, thupha chawina emaw, Assembly house-ah ngei nei/siam turin kan phut tlat a ni,” an ti.
Siaha district-a tlawmngai pawl hrang hrang – MTP, MSO MCHP leh political party pathum – BJP, INC leh ZPM te pawhin thuchhuah intawm siamin, sixth schedule amendment leh direct funding chungchanga DC&MA Minister R Lalzirliana thusawi chu hriatthiam har an tih thu sawiin, ram leh hnam inhmuhsitnaah an ngaih thu an sawi a. A thusawi duh lohna lantir nan March 1, 2023, chhun dar 1 hian Siaha Bazar hmunah ‘Joint Programme’ neih an tum.
Lai Women Association, Gen. Hqrs., Lawngtlai pawhin thuchhuah siamin, DC&MA department changtu minister R Lalzirliana’n sixth schedule chungchang a sawi dan tawngkam chu ADC area mipuite leh Lai hnam pumpui hmuhsitnaah an ngaih thu leh an rilru a nat thu sawiin, an dem thu an sawi a. Minister hi rorelna fawng vuana ADC enkawltu atan mawhphurhna chelh zel tlakah an ngaih loh thu an sawi a. Tun hnuah hetiang inhmuhsitna tawngkam hi hmang nawn tawh lo turin an ngen.