Aizawl: MJA President C Lalrambuatsaiha chuan nimin khan ICFAI University, Mizorama Management & Information Technology Department zirlai Industrial Study Tour-a kal turte a thlah liam.
Industrial Study Tour-a kal turte thlahna inkhawm hi YMA, Thuampui Branch Committee Room-ah buatsaih a ni a; MJA President chuan, zirlaite chu an kalna apiangah hriat belh neih tum tura chahin, “Intelligent mind, intelligent eye nei ula. Industry hrang hrang in tlawhnaah zir chhuah neih ngei in tum tur a ni. Zawhna ngah ula, zawhna in ngah poh leh in hriatna a pung ang,” tiin Mizoram tan thil tha rawn puak chhuah tum a, lehkhathiam nihna hi chhawr tlak a nih theih nan inzir chhuah tum turin a chah.
ICFAI University Management & Information Technology Department zirlai Industrial Study Tour-a kalte hi zirlai 25 an ni a, zirtirtu pahnihin an hruai a, March 5, 2023-ah Mizoramah an rawn let ang. An zin chhungin Blueberry Amul industry, Vantage Circle, Assam Startup – The Nest leh NEDFI hmunte tlawhin an zir chiang dawn a ni.
Zirlaite thlahna inkhawmah hian MJA President C Lalrambuatsaiha hi MJA Vice President Lalremsiama, General Secretary Lalrinmawia Sailo leh Secretary K Zothanpara ten an tawiawm a ni.