Aizawl: All India Congress Committee ‘AICC 85th Session,’ Raipur, Chhattisgarh-a telte chu nimin khan Lengpui Airport-ah MPYCC-in an hmuak a, a hmuaktute hmaah thu sawiin MPCC President Lalsawta chuan Mizoram siam tha turin theihtawp chhuah an tum thu a sawi.
Lalsawta hian hmun danga kalin rualawh a na thin tih sawiin, “Mizoram siam that hi kan thei rengin kan hre si a, chuvang chuan rualawtin kan lo haw. Inthlan kum a ni a, theihtawpin kan han ti ang a, thalaiten theihtawp in thawh tak tak ang a, kan ram siam tur hian thil harsa a awm lo,” a ti.
Ram siam tha turin a mihringte ngaihtuahna tihdanglamsak hi a ni ber tih sawiin MPCC president hian, “Tuna kan kalphung mek anga pawisa nei tam tam ang ringawt, inthlanaah pawh tling tura kan hisap, nei ve lotena kan tel ve pha dawn loa kan han inhre sa ngawt ang chi hian min tithlaphang thin,” a ti bawk.
“Mahse, hei hi chu mipuiin kan ngaihtuah dan ber kan tihdanglam chuan Mizote thil zir chak kan nia, kan ram tan that lohzia kan hria a. Keimahni mai bakah kohhran leh NGO zawng zawng leh Pathian thlengin a duh loh kan hria a, huai takin min puitu tur a phena awm hi an tha em a, kan sorkar ngei theihna turin theihtawp kan chhuah dawn a ni,” tiin mipui ngaihtuah dan ber tihdanglam a nih chuan hausa leh neinung ringawtte ram hruaitu atana dahna rilru chu siam danglam theih a nih a beisei thu MPCC president hian a sawi.
‘AICC 85th Session’-a Mizoram atanga kalte hi Lalsawta, President, MPCC; CS Thanga, G/S; Dr. Lallianchhunga, Chairman, Media Dept., MPCC; Vanlalawmpuii Chawngthu, Ex-Minister, President, Mahila leh Dr. Lalmalsawma, President, MPYCC te an ni.