Motorbike-a chuang mi sual rualin Niger khawthlang lam, Mali nena an inrina, buaina chhuah rengna hmuna khua an rûnnaah mi 14 vel an that.
Khaw beihna hi Pathianni chawhnu dar 3:00 (India sanaa zan dar 7:30) vela thleng niin tute nge an nih hriat loh, ralthuam nena inthuamte hian Banibangou district-a Wiye khua, Mali nena an inrina atanga km 50 vel chauhva hla hi an rûn a ni.
Interior ministry-in Thawhtannia an ram TV-a thuchhuah a siamah a beitute hian civil mi an tum a, mi 14 an thah a, an zinga pakua chu lova hna thawk lai an ni tih a tar lang.
Mi pakhat inhliam chu an khawpui, Niamey-a enkawl turin lak a ni bawk a. Venhimna tihkhauh nghal niin a beitute hi tute nge tih hriat tumin chhui a ni a, “Dawihzep leh rawng taka chete hi na taka hrem an ni ang,” an ti.
He thil thleng hi eng pawl mahin an tihah an la chhal lo.
Banibangou district hi ram pathum – Niger, Burkina Faso leh Mali inrinna lai bawra awm a ni a, tun hma atang tawhin hel pawl lian tak tak, al-Qaeda leh ISIL nena inzawmna neite hi rawng tak takin an lo che tawh thin.