Italy chhim lam tuipuia an lawng chuanna pil avanga thi chu mi 100 an chuan rinna a lian ta hle a, an zingah hian naupang pawh tel nual turah ngaih a ni bawk.
Tun thleng chuan ram danga pem tum mi 62 an thi tih tihchian a ni tawh.Mi 200 vel chuanna nia rin lawng hi Pathianni khan Crotone bula khawmual kai an tum laiin a bung a ni.
Mi chuangte hi Afghanistan, Somalia, Pakistan leh Iran-a mite an ni hlawm.
Calabria region-a chhiatna thlengah hian ruangte chu tuipui kam atangin vaukama chawlh hmanna hmunah lak an ni a. An zingah hian naupang 12 a tel a, nausen a tel bawk.
Coastguard chuan mi 80 dama an hmuh thu an sawi a, ‘an zingah hian lawng a pil hnua vaukama mahnia inhai chhuak pawh an tel’ tih an sawi a, an chin la hriat loh hi an zat hriat theih a la ni lo.
Pakistan Prime Minister Shehbaz Sharif chuan an mi 24 chuang thi zinga a tel thu a sawi a, an chanchin hriat chuan a tilungchhiain pawi a ti tak zet tih a sawi a. A ram palai pawh ‘a rang thei ang bera’ thil thleng leh nih dan kimchang hriat tum thuai turin a ti.
Médicins Sans Frontières (MSF) chuan dam chhuakte bawihsawm leh tanpui hna an thawk mek.
“Hnuchham an awm nghal nual a. An zingah hian Afghan mipa naupang kum 12 mi, a chhungte mi pakua chân a tel a; a nu leh pa bakah a unaute pali leh an chhung hnaite an thi vek a ni,” tiin tanpuitu pawla mi, Sergio Di Dato chuan a sawi.
Thawhtanni tuk khan Geneva-a Human Rights Council thutkhawmah UN Secretary-General Antonio Guterrez-a chuan raltlan leh pemte puihna kawngah tan la leh zual turin ram tin a ngen a, an kalkawng him zawk leh chhiat an tawha chhanchhuahna pawh tichangtlung turin a ngen.
“Nimin (Pathianni) maiah pawh anmahni leh a fate tan nun nuam zawk beiseia chhuakte chuan Mediterranean-ah chhiat tawk lehin nunna tam tak hloh a ni leh a. Raltlan leh pemte dikna chanvo hi mihring dikna chanvo tho a ni a. Thliarna awm lovin kan zah ve tho tur a ni,” a ti.
Pemna kawngpuite mi sual rualin an thunun chhung chuan thi an awm zel dawn tih Guterres chuan a sawi bawk a. “Himna, dan ang taka pemna kawng kan mamawh a. Nunna chhan nan mi zawn leh chhanchhuahna lam pawh kan tihchak a ngai a, dan ang leh mahni mihringpuite laka tih tur ang takin damdawi hmanga puihna pawh kan tihthat a tul,” a ti.
Customs Police chuan dam chhuak zinga pakhat chu pem tumte a hruai danah dan bawhchhiaa puhin man a ni tih an sawi.
Nikuma thlan tlin, Italy-a pem lut tam lutuk tihtlem tiamtu, Prime Minister Giorgio Meloni chuan chhiatna thleng pawi a tih thu a sawi a, a hruaitute a đem bawk.
Chhiat tawk lawng hi ni eng emaw zat liam taa Turkey atanga chhuak a ni a, khawmual an kai tep tawhah tui fawn so bulh bulh karah lung suin an lawng a keh ta a ni.
Video atanga a lan dan chuan lawng sakna thingte chu vau lamah tui fawnin a vawrh chhuak nasa hle.
Pem dinhmun viltute chuan kum 2014 atang khan Mediterranean laili-ah hian pem tum mi 20,000 chuang zet tuipuia thi leh chin hriat loh an awm tawh.