Sri Lankan thuneitute chuan khawvela star sapphire cluster (lung man tam chi khat) lian ber chu tihpalh thilin in bulah an lai chhuak tih an sawi.
Lungmawi hmanga sumdawng chuan he lung hi lungmawi tamna, Ratnapura-a an in bula a hna thawkten lei an laihnaah an lai chhuak tih a sawi.
Mi thiamte chuan lung pawl dal an laih chhuah hi $ maktaduai 100 vel zetin a hralh theih dawn niin an sawi.
Kg 510 vela rih, carat maktaduai 2.5 vel niin ‘Serendipity Sapphire’ tiin a hming an phuah.
“Khur laitu pakhat chuan lung danglam tak an hmuh thu hi min rawn hrilh a. A hnua kan laih chhuah chuan lung mawi lian tak kan la chhuak ta a ni,” tiin a neitu, Gamage chuan BBC hnenah a sawi a. A hming pum hi a hmun leh venhimna thil avangin a sawi duh lo.
Gamage-a hi a pu atanga lung mawia sumdawng niin an lung laih chhuah hi thuneitute pawh a hrilh a; mahse, chirh leh amah bawmtu dangte tihfai nan kum khat chuang an hmang a, a hnuah eng lung nge tih an hre thei chauh.
An tih fai lai hian lung thenkhat tlate chu an en chian hnuah star sapphire tha ber chi a nih hlawm thu a sawi bawk.
Ratnapura hi Sinhalese tawng niin lung mawi khawpui tihna a ni a, Sri Lanka-ah chuan lung mawi khawpui tia sawi a ni thin a. Tun hma pawhin lung man tam tak tak laih chhuah a lo ni fo tawh thin.
Sri Lanka hi khawvela sapphire leh lung mawi dang thawn chhuak tam ber ram an ni.
Nikum pawh khan $ tluklehdingawn zahve vel zet an lungmawi thawn chhuah atangin sum an la lut a ni.