Tottenham Hotspur in London derby-ah hnehna pawimawh an chang a. Premier League-ah a sang pali zinga tel thei tura beiseina thar insiamin 2-0 in Chelsea an hneh.
Pathianni zana Premier League inkhelah Tottenham Hotspur Stadium-ah Graham Potter-a pawlte hi Spurs in an mikhual a. An mikhualte hi tunhnaia an chet that loh avangin an chungah ‘pressure’ a sang tawh.
London hmar lam club leh khawpui thlang lama club inkhel an nih avangin boruak a sang a. Chance pawh team pahnihten an nei zeuh zeuh.
First half a goal a luh loh hnuah second half tan hnuah erawh nghah rei a ngai lo. Spurs midfielder Oliver Skipp chuan metre 18 a hla atangin goal mawi a hlap lut.
Minute 82-naah Tottenham bawkin an hnehna tichiang turin goal an khung a. Striker Harry Kane chuan goal khungin tun season a league goal 18 a khungna a ni.
An result avangin palinaah an dinhmun an sawhnghet lailawk a. An hnuaia awm Newcastle United erawhin an la pel thei.
Lehlamah Blues hian January ah sum tam tak an seng chungin result tha an nei thei chuang lova. League match hnuhnung 15 atang vawi hnih chiah chak an la nei.
Spurs assistant head coach Cristian Stellini chuan, “Kan duh leh tum ber chu hnehna chan kha a ni a, tha taka khelh kan duh. Ball chang tam a, inkhel kaihruaitu ni turin theihtawp a beih kha kan tum a. Kan fans te bakah club leh kan zavai tan result lawmawm tak a ni.” tiin a sawi.