Chelsea defender Thiago Silva chu a khup na avangin rin aiin a chawl rei dawn a, kar ruk tal a chawl dawn niin an sawi.
Kum 38 mi Brazil captain hi Pathianni zana Tottenham Hotspur nen an inkhelh tumin a inhliam a. Thawhtanni khan club lamin a hliam hi endikin a khup a tha awm a ti na tih an hmu.
Chelsea chuan thuchhuah siamin, “Silva hliam hi endik a ni a, tunah chuan club medical department hnuaiah a dam thuai theihna turin enkawl a ni ang.” tiin an sawi.
Blues hian Silva chawlh chhung tur hi sawi lo mahse a khup hliam hi zai ngai a nih loh pawhin kar ruk vel tal ni turah an ngai.
Chelsea hian karlehah UEFA Champions League round of 16-ah Borussia Dortmund an hmachhawn dawn a, hetah hian an defender pawimawh hi a tel thei dawn lo chiang.
Graham Potter-a pawlte hian season hautak an hmang mek a. Match 15 atangin vawi hnih chiah tunhnaiah chak an la nei.
Mimal lamah erawh Silva hi player pawimawh ni mekin tun thla khan kum khat dang contract club in an ziah belhpui tawh.