Budget Session-a Autonomous District Council (ADC) chungchang a sawi dan avanga pawl hrang hrang dem rawn, District Council & Minority Affairs (DC&MA) Minister R Lalzirliana’n chhim lam mipuite ngaihdam a dil.
Tar lan tawh angin DC&MA minister hian February 23, 2023 khan Assembly House-ah ADC chungchang sawiin, a thu sawi dan chu dictrict council huam chhunga pawl hrang hrangin demin ngaihdam dil turin an phut a, he a thusawi avang hian minister a nihna atanga bân phuttute pawh an awm hial a ni.
He thu kal zelah hian DC&MA minister chuan nimin khan Assembly Session-ah statement siamin a tawngkam inkawkalh neuh neuh a awm thu tar langin, a tawngkam chu a ennawn lehin a duhzawng a nih bik loh thu leh, mi pakhat rilru tihnat pawh hrehawm a ti a, a duh loh laiin chhim lam mipuite rilru a tina tih a sawi a, “Ka thusawiah chhim lama kan unaute rilru ka lo tina a nih chuan ngaihdam ka dil e,” a ti.
R Lalzirliana chuan DC&MA department chu Congress sorkar laiin kum 10 dawn a lo enkawl tawh thu sawiin, khatihlaia chief minister, Lal Thanhawla hnenah a tlin loh thu hrilha chhawk tura a ngen angin term tawp lamah chief minister-in a chhawk tak thu a sawi.
MNF sorkarah pawh DC&MA department chu enkawltir a nih leh thu sawiin, tun term-a a kuta dah leh a nih hnuah pawh Chief Minister Zoramthanga hnenah mi dang kuta dah zawk tura vawi tam a dil thu a sawi a, “Ka thiam lo khawp mai, hei tun term-ah saw lam saw ka la thleng phei lo,” a ti.
DC&MA department chu enkawl tawh loh a duh thu R Lalzirliana chuan sawiin, “He department enkawl tur hian politics hlang deuhthaw a ngai a, mi chak zawkte an duh anga pek theih a nih chuan ka lawm ngawt ang,” a ti bawk.