Ecuador-a police-te chuan Belgium lama kal tur balhla phurhnaah cocaine tonne 8.8 dawn an man.
Police commander Fausto Salinas chuan heng ruihhlote hi an thlenpui tumna an thlen hunah chuan $ maktaduai 330 man zet a ni dawn tih a sawi.
Belgium-a thawn tur balhla dahna bawm lian, container-a balhla khat tlat kara dah chu an man chhuak a ni.
Ruihhlo an man lai tak hi Belgium Interior Minister Annelies Verlinden leh European Commissioner for Home Affairs Ylva Johansson ten Ecuador leh Colombia an tlawh lai tak a ni nghe nghe.
Mi pawimawh pahnihte hian South American ram hnih nena ruihhlo tawlh thin tibo tura thawhhona tha zawk neih zel duh avanga tlawh an ni.
Belgium hi tun hnai kum eng emaw ti chhung chu European Union ram zinga cocaine man a tam ber berna hmun a ni a, Antwerp lawngchawlh hmun chu dan phal loh ruihhlo luhna pui ber a ni.
European Monitoring Centre for Drugs & Drug Addiction director, Alexis Gosdeel chuan tun thla tir khan ‘cocaine lut nasa lutuk chu European Union tan pawha hlauhawm tham’ a nih thu a lo sawi tawh.
“EU-a cocaine hralh leh vir vel hian tharum thawhna leh mipui rawngbawlna leh sorkarah ei rukna a tihtam a hlauhawm hle a ni,” tiin a sawi a ni.
Ecuador-ah pawh hian Mexican cartel-ten sumdawnna hlawk tak hi thunun tuma an mite an tirh lut nasat avangin ruihhlo tawlh kaihhnawiha tharum thawhna hi a thleng nasa hle.
Lung inte pawh a tawt phah em em a, tan in chhungah pawh heng ruihhlo tawlhtu pawlte hi a pawl pawla an la intihbuai zui fo avangin thihna a thleng nasa thin hle a ni.