Mizorama G20 Business Meeting neih turah Mizoramin theihna a neih leh a thil hlute ram hrang hrang palaite hnenah pho lan an tum thu Chief Minister Zoramthanga’n a sawi a, intawhkhawm chu hman tangkai ngei an tum thu a sawi.
G20 Business Meeting atana sorkar inbuatsaihna chungchangte thuthar thehdarhtute hrilhin chief minister chuan Mizoramin sumdawnna kawnga hma a sawn theihna turin intawhkhawm chu hman tangkai ngei an tum thu a sawi a ni.
Chief minister chuan G20 thutkhawm chu March 2-ah MZU Conference Hall-ah neih a nih tur thu leh ram 17-in palai an rawn tirh tur thu sawiin, “Thutkhawmah hian Mizoramin eng theihna nge a neih tihte zirchiangin sawiho a ni dawn a ni,” a ti.
G20 thutkhawm chu Mizoramin theihna a neihte leh a thil hlute bakah khualzin hip tak state a nihna te, state ralmuang a nihna te chu pawn lam mite tan investment tihna remchang a nihzia lo pho lanna remchang a nih tur thu chief minister chuan a sawi a. “Hetah hian urban planning, infrastructure, mau, sumdawn bultanna, handloom & handicraft, nursing leh paramedics-a multilateral business partnership neih theihna tur lam kan thupui ber dawn,” a ti a. Thutkhawma tel ram hrang hrang palaite chu March 3-a Chapchar Kût lawmnaa an tel ve theihna tura ruahmanna siam a nih thu a sawi bawk.
Chief minister-in a sawi danin he thutkhawmah hian – Argentina, Bangladesh, Bhutan, Canada, Costa Rica, Cote D’Ivoire (Ivosry Cost), China, France, Germany, Ghana, Japan, Nepal, Russia, Sri lanka, South Africa, United States leh Zimbabwe aiawhte an tel ang a. Heng bakah hian India ram chhung leh tual chhung mi eng emaw zat an tel bawk ang.
Ram pawn atangin mi 48 an tel thei tura ngaih a ni a, Bhutan, Bangladesh leh Japan atangin sumdawnna lama mi thiam bik 17 an tel dawn bawk a ni.