BJP chuan India hmarchhakah hniak thar an hnutchhiah leh ngei dawn niin a lang a. Tripura leh Nagaland-ah sorkarna an siam ngei dawn niin exit poll atangin a lang a, Meghalaya-ah pawh a hma aiin MLA an ngah dawn a nih hmel hle.
Hmarchhak state pathuma assembly inthlan neih zawh taka exit poll atanga a lan dan chuan BJP hian Nagaland-a an thawhpui, NDPP (Nationalist Democratic Progressive Party) nen sorkarna an siam hmel a, Meghalaya-ah pawh bial sarih vel an lak hmel a, a hmaa bial hnih chauh nei atangin hma an sawn dawn hle a nih hmel.
Tripura-ah phei chuan kum 2018-a an dinhmun ngaihtuahin an kâng nasa hle a, anmahnia sorkar siam thei khawp hial an nih rin a ni.
Exit poll-a a lan dan chuan Congress erawh an dinhmun a la chhe zui zel dawn a. Nagaland-ah bial khat chauh la tur leh Meghalaya-ah bial ruk la tura dah an ni a, he state-ah hian term liam chiah turah chuan party mala MLA ngah ber an ni.
Exit poll hi innghahna tlak erawh a ni lo va, state pathumah hian Ninganiah vote tlate chhiar a ni ang.
Exit poll pali atanga a lan dan khaikhawmah chuan BJP hian Tripura-a bial 60 awmah bial 32 an lak hmel a, mahnia sorkar siam tura bial 31 lak ngaiah a aia tam an la dawn nia ngaih a ni.
Kum 30 chuang ro lo rel tawh, Left party-te chuan bial 15 chauh an lak rin a ni a, an thawhpui, Congress phei chuan MLA an neih loh a rinawm zawk.
Lal thlah, Pradyot Kishore Debbarma-a’n a din, Greater Tipraland state din tuma bei mek, Tipra Motha chuan MLA 12 an neih rin a ni bawk.
Inthlan hnuhnung berah khan BJP hian bial 36 an la a, bial riat la vetu, IPFT (Indigenous Progressive Front of Tripura) nen thawk dunin sorkarna an siam tho va, an MLA thenkhatin an thawhpui hi an zawm zui nghe nghe a. Tun tumah hian Tipra Motha nen hian an thawhho mai rin a ni.
BJP hian Tipra Motha nen hian inremna pawh an nei hman a; mahse, tun dinhmunah Tripura then tumna engmah an la tiam theih loh avangin an inrem tluantling thei lo.
Meghalaya-ah ve thung hian an inbei tawk hle hlawm thung a. Conrad Sangma kaihhruai, NPP (National People’s Party) chu party mala MLA ngah ber tura ngaih niin bial 20 an lak rin a ni a. Kum 2018-a bial hnih chauh latu, BJP chuan nasa taka hma sawnin bial riat vel an lak rin a ni a. Congress chuan bial ruk lain a vawi khat nana chuh ve, Trinamool Congress pawhin bial 11 lai an lak nghal rin a ni.
Kum 2018 khan BJP hian bial hnih chauh la mah se NPP nen sorkar intawm an siam a. Tun tumah hian anmahni puala chuhin bial 60-ah an chuh kim vek a, Sangma-a party nen hian ei rua inpuhin an inhmu thiam lo deuh a ni.
Exit poll atanga a lan dan chuan intithiam lo deuh tawh mah se BJP hian Sangma-a party an biak that a ngaih leh hmel tho va, heti chung hian sorkar siam thei khawp an la ni dawn lo va, Mamata Banerjee-i kaihhruai, Trinamool Congress chu thuneitu tur siamtu pawimawh tak an ni thei dawnin a lang a ni.
Nagaland-ah chuan BJP-NDPP tang dun chuan bial 42 zet an lak rin a ni a, MLA 31 neiha sorkar siam theih a nih avangin buaina a awm hmel loh va. NPF chuan bial ruk an lak rin niin Congress chuan bial khat an chang ve dawn bawk niin exit poll pali khaikhawmna atang chuan a lang a ni.