Argentina leh Paris St-Germain forward Lionel Messi chu FIFA in player tha chawimawina a sem zanah Men’s Player of the Year ah an thlang.
Argentina thiampuipa Lionel Messi chu Thawhtanni zanah khawvela player tha ber a thlan a ni a. A Paris Saint-Germain teammate Kylian Mbappe leh Real Madrid star Karim Benzema te khumin Best FIFA Men’s Player chawimawina a dawng.
Paris khawpuiah FIFA chawimawina lian hi sem a ni a. Messi hian kum tha a hman chu 2022 World Cup nen December khan a khar a. Paris khawpuia a season hmasa ber beisei angin hmang lo mahse a season hnihna hman mekah club tan a che tha pangngai a. World Cup-ah an ram a hlawhtlinpuina chuan a buk a ti rit hle.
An ramin kum 36 chhung a nghah tawh World Cup trophy chu a lakpui a. Professional football a khelh chhunga a trophy lak theih zinga a lak loh awmchhun a la.
Record ni tura Ballon d’Or vawi sarih la tawh Messi hian FIFA The Best chawimawina hi vawi hnih a dawnna a ni a, kum 2019 khan a lo dawng tawh.
“Ka tan kum duhawm leh ropui a ni a, zaninah he chawimawina ka dawng hi thil hlu tak a ni. Ka coach Scaloni leh ka teammate te chungah lawmthu ka sawi a, an tel lovin zaninah hian ka rawn ding dawn lo.”
“Hunrei tak atanga ka lo suangtuah tawh thin chu a takah ka chantir ta a ni a. Hei hi eng player pawhin an duhthusam a ni thin. Mi tlemte chauh thlen theih a ni a, heng zinga ka tel hi mi vannei ka ni.” a ti.
Chawimawina dang
Paris a chawimawina dang an semah hmeichhe football-ah Barcelona leh Spain star Alexia Putellas chu Best FIFA Women’s Player a thlan a ni a. A kum zawnin he chawimawina hi a dawng.
Mipa chawimawina dangah Argentina coach Lionel Scaloni chu coach lawmman dawngtu niin an goalkeeper Emiliano Martinez chuan chawimawina a dawng ve bawk.
Hmeichhe lamah England goal vengtu Mary Earps chu Best goalkeeper a thlan a ni a. England hmeichhe team enkawltu Dutch coach Sarina Wiegma chu Best coach a thlan a ni thung.