Aizawl : Sports Minister Robert Romawia Royte-in Lawngtlai Residential Sports School sak mekah hna zaa 88 chuang thawh zawh tawh a nih thu leh kumtharah a taka kalpui theih a nih a beisei thu House a hrilh.
Nimina Assembly session-a Lawngtlai West bialtu MLA C Ngunlianchunga zawhna chhangin Sports Minister chuan, “Lawngtlai Residential Sports School chu sak mek a ni a, hnathawktu ten an sa chak a, building pawh an sa tha a, tunah hian hnathawh tur atanga zaa 88 chuang an thawk zo tawh a, nakum atangin tha takin a kal theih kan beisei,” a ti.
Lawngtlai Residential Sports School chu sak zawh a nih hunah Sports & Youth Services department-in an enkawl dawn tih Sports Minister chuan sawiin, sorkarin tangkai taka hman zui dan tur a ruahman dawn tih a sawi.
Sports Minister chuan, Lawngtlai leh Lungleia sports school te chu Mizoram sorkar sum tiheklo zawnga kalpui theih a nih an beisei thu a sawi a. Tunah pawh sports school lo buaipui tawh thin society ten an ngaihven hle nia sawiin, school sak lai mek te chu a hmunah enin, an indawr mek niin a sawi.
Heng sports school te hi a taka kalpui a nih hunah chuan Mizoramin a chhawr tangkai ngei a beisei thu sawiin, “football zirna bik chauh kan neih te pawh India ramah an che tha em em a, academic nena kalkawp thei school a awm hunah phei chuan hmasawnna nasa tak hmuh tur a awm kan beisei” Sports Minister chuan a ti bawk.