ZPM chuan nimin khan Larsap Dr. Hari Babu Kambhampati chu Raj Bhavan-ah hmuin Minister of State Robert Romawia Royte-in Section 9(A) Representation of the People Act 1951 bawhchhiaah puhin bân turin ngenna an theh lut.
MoS Robert Romawia Royte bân tura ngenna an theh luhah hian ZPM aiawhin SL Ngursailova Sailo, General Secretary, Vigilance Department-in hming a ziak.
SL Ngursailova Sailo chuan Robert Romawia Royte hian The Representation of People Act 1951 bawhchhiain dik lo takin a thuneihna hmanga hlawkna a tel avangin (office of profit) Article 192 (1) to the Constitution of India thuneihna hmanga disqualify turin governor hi an ngen thu a sawi.
ZPM chuan, “Robert Romawia Royte hi Northeast Consultancy Services (NECS) neitu niin vawiin thlengin chhiah pawh GST hnuaiah return a la file a. He firm hian duhsakna uchuak tak hmangin Mizoram sorkara DC&MA nen Deed of Agreement chu Single Source Selection hmangin an ziak a. NECS hi proprietorship, mi mal sumdawnna a nih angin a neitu leh hlawkna teltu chu MoS Robert Romawia hi a ni tih a chiang hle,” an ti.
Assembly House chhungah a fapa ta anga a sawi pawh kha election affidavit-ah a fapa hi a hnena innghat (dependent) a ni tih a tar lang nia sawiin ZPM chuan, “Hei bakah electoral roll thar berah pawh chhungkaw khat, in khata cheng an ni tih a lang bawk. Mizo Customary Law hnuaiah a fapa hi in dang a la nih loh avangin a fapa ta anga a sawi pawh hi a nihna takah chuan thuneitu leh enkawltu chu Minister of State hi a ni,” an ti bawk.
“Heng zawng zawng en hian Minister of State hian a thutiam bawhchhiain a thuneihna hmangin sorkar atangin hlawkna a tel ngei a ni tih a tar lang,” tiin, ZPM party chuan India danpui hnuaiah Minister of State a nihna atanga bân turin governor hi an ngen tak thu an sawi.