India chhim lam, Kerala-a temple pakhat chuan mitthi vuinaa sai an hman thin chu khawl hmang saiin an thlak.
Irinjadappilly Sree Krishna Temple, Thrissur district hian sakhaw thiltihnaa rannung hman tihtawp an intiamna kal zelah he ruahmanna hi an siam a ni.
Sai lem hi People for Ethical Treatment of Animals (PETA) India leh lemchang thiam, Parvathy Thiruvothu-i ten an thawh a ni.
Sai lem nen hi chuan eng pawh ti dawn sela venthawn leh dimna tel lovin thil an ti thei tawh dawn a ni.
Kerala-ah hian sai hi thir khaidiatin an thlung a, a chungah chuanna tur thang an dawh a, nasa taka cheiin temple-a kût hmannaah an uar hle thin a. He state hi India-a sai chhawr thin 2,500 vel zinga hmun ngaa thena hmun khat vel awmna a ni.
Kum tam tak kal tawh atang khan ramsa humhalhtute chuan an tih dan vel hi a ngaimawhawm thu an lo sawi tawh thin a. Centre for Research on Animal Rights chuan kar hmasa khan chief minister hnenah khawmuala cheng chu ramsa thihna a tam thar lutuk tih an thlen a. Kum 2018 leh 2013 inkarah Kerala-a sai khawn 138 zet an thi niin an sawi.
Thawhtannia PETA-in thu an chhuahah sai nungte bula kût hmana bengchheng tak ringawt pawh an tan tawrh a hrehawm tih sawiin temple zawng zawngte chu khawl hmanga siam, a tak ang chiah sai hmang tawh turin an ngen a ni.
Indian Express chanchinbu chuan sai lem hi feet 11 (3.3m)-a sang, kg 800 (1763.7 lbs)-a rit niin a ruangruh chu thira siam a ni tih a tar lang.
Temple puithiam, Rajkumar Namboothiri chuan khawl hmang sai an dawng chu thuneitute an lawm tak zet tih a hrilh bawk.
“Temple dangte pawhin hetiang sai khawl thunun theih ang hmang hian thil an tih zel tawh ka beisei,” tiin a sawi bawk.