Aizawl: I&PR Deptt., Mizo Photographers’ Society (MPS) leh Mizoram Art Development Society (MADS) tangtlangin Chapchar Kût Photo & Art Exhibition, Vanapa Hall-a an buatsaih chu nimin khan I&PR Minister Lalruatkima’n a hawng a. Exhibition-ah hian painting 90 leh thlalak 114 pho chhuah a ni.
Minister chuan art chu eizawnna tha tak a tling tih sawiin, kut themthiamna – thlalak leh lemziakte chu uar deuh deuh turin thalaite a sawm a. Mizoramin G20 meeting a thlen tur leh Chapchar Kût innang chu Mizo hnam ziarang – Zo nun mawi tlawmngaihna, rinawmna leh huaisennate pho lanna remchang a nih thu sawiin, “Kan hnam ziarangte kan pho chhuah thiam a tul hle,” a ti.
Lalruatkima chuan I&PR dept. chu chanchinbumite nen chanchin thar thehdarh kawnga an thawhdun that thu leh art, photo leh film lam hmasawnna tur leh thalaite tuina leh thiam zawngte dap chhuahpui tura society hrang hrangte nen thawhhona tha tak neia hmasawnna a kalpui mek thu a sawi a. “G-20 summit a palai lokalte hnenah art exhibition hmanga kan hnam ziarang pho lanna hun tha tak kan nei hi a hlu hle a ni,” a ti bawk.
Sorkar thuchhuahin a tar lan danin I&PR department-in kum 2022-23-ah MADS nen tangkawpin art workshop vawi thum, exhibition vawi hnih, solo exhibition vawi hnih, outdoor painting workshop vawi khat an buatsaih tawh bakah Lunglei-ah art festival an buatsaih a. I&PR leh MPS tangkawpin World Photography Day leh MPS kum 10 tlin lawmna photo competition an buatsaih bakah West Phaileng leh Champhai-ah workshop leh photo competition an buaisaih bawk a ni.