Lazio in huntawp dawnah goal an khung hmangin 1-0 in Sampdoria lakah hnehna an chang a, Serie A-ah palinaah an inhlangkai.
Thawhtanni zana Stadio Olimpico a inkhelah hian Lazio tan midfielder Luis Alberto chuan penalty area pawnah ball changin minute 80-naah kawh zet maiin a pet goal a. He goal hi an chak phah.
Inkhel pumpuiah Lazio kheltha zawk mahse Sampdoria tlarhnung thiah mai an awlsam bik lo. First half-ah striker Ciro Immobile chuan goal zawnah a chance neih a pet thei lova. Second half-ah pawh goal hma zawn atangin a tauh sang lutuk.
Goal an khung hnuah Lazio dinhmun a tha a, Sampdoria in chhanlet tum mahse an insiamrem hleihtheih loh avangin goal hlauhawm an ngah lo.
Lazio hian khelh 24 atangin point 45 an hmu mek a, point khatin AS Roma lakah hma an hruai a. Roma hian nizan khan table mawngphah a awm Cremonese an hmachhawn ve thung.
Bianconeri coach Maurizio Sarri chuan inkhel a goal khungtu Alberto fakin inkhel a thlak danglam niin a sawi. “Kar hmasa Ningani khan Romana a inkhel player pasarih vel kan nei a, chuvangin kan inkhel kaldan a mak lo. Luis Alberto khan ka duh a hria a, inkhel a thlak danglam chiang hle.” a ti.