Thawhtanni zan khan Tuivawl lei leh Saichal inkar, Tuivawl lei atanga km 3 velah TATA Trailer (Truck) MP-09 HH 9052 (ke 12 nei) chu chesualin kawngthlang lam metre 80 vel a lum a. Trailer-ah hian mi pahnih chuangin second driver Lakhi Ram Baski, kum 34, Godda district, Jharkhand chu a hmunah a boral.
Lirthei hi Doyamay Chakma (32), Tuipuibari khalh niin, driver hi vanneihthlak takin hliam na lutuk a nei lo va, an lumna atangin kawngpuiah vak chhuakin kawng bula mi thlamah khua a nghak var a, khawvar hnu hian a bul velah tanpuitu zawngin ram riak a hmu fuh a, chetsual thu hi inhrilh darh a ni ta a ni.
Trailer hi NHIDCL hnuaia National Highway 102B Package 1 thawktu, BR Goyal Infrastructure Limited-te ta niin, NE Khawdungseia camp nei an ni a. Nimin piah khan alkatra la tura Aizawl kal tum an ni.
Driver Doyamay Chakma sawi danin, an chetsual hma hian motor brake chuan hna a thawk tha tawk lo va, lirthei a sei avang leh kawng a tet avangin a thunun zo ta lo a ni.
Chetsual thu hriat a nih veleh a hre hmasa, Saichal khawtlang leh Saitual Chawnpui Branch YMA, Sub. Hqrs YMA Saitual leh Saitual Police-te chuan chetsualna hmun hi an pan nghal a. Police-te hian a hmunah inquest an tih hnuah ruang hi District Hospital, Saitualah post mortem tura lak a ni a, Saichal Br.YMA chuan a kuang tumin nimin vek hian Jharkhand panpui a ni.