Aizawl: Chief Minister Zoramthanga’n tuna Aizawla Assam Rifles awmna hmun, Lammual leh a chhehvelah sorkarin Laldenga Centre din a tum a, chumi atana lungphum chu March 17, 2023-ah Union Home Minister Amit Shah-a’n a phum dawn niin a sawi a. Assam Rifles Complex pawh a hawng nghal dawn niin a sawi.
Assam Rifles-ten Aizawl khawpui lailia an awm mekna chhuahsana Zokhawsanga an insawn hun tur chu chiang taka hriat theih la ni lo mah se, an ram chhuahsan turah chuan Laldenga Centre dinna tur lungphum erawh phum tura ruahman a nih thu nimin khan thuthar thehdarhtute kawmin chief minister chuan a sawi a. March 17, 2023-ah union home minister-in a dinna tur lungphum chu a phum tur thu sawiin, Assam Rifles Complex pawh a hawng nghal dawn niin a sawi bawk.
Chief minister chuan nikum lam khan thuthar thehdarhtute a kawmnaah Zokhawsanga Assam Rifles headquarters tur chu union home minister-in hawn a châk avangin November thlaa hawn tuma ruahmanna siam a nih thu sawiin, luah theih tura a hawn chuan Assam Rifles chu insuanlut nghal mai tura ngaih an nih thu a lo sawi tawh a. He ruahmanna hi a hlawhtling ta lo thung.
Hemi chungchang hi mipuiin an ngaihven hle a, politics thila inbeihna atan pawh hman hial a ni a, assembly session nimina zawh takah pawh Assam Rifles insawn hun tur chungchang chu eptu member-ten an zawt hlawm a ni.
Chief minister leh union home minister inkawmin AR hmun thar tur hawn hun an ruahman chu hlawhtling ta lo mah se March 17, 2023-ah hian hawn a ni dawn ta niin chief minister chuan a sawi a ni.