February 13, 2023-a tan, Mizoram Legislative Assembly budget session chu Thawhlehni khan a tiak. Tun tum session-ah hian kum 2023-2024 chhunga Mizoram budget tur pawm a ni.
Assembly Speaker Lalrinliana Sailo chuan, Lok Sabha leh Rajya Sabha thutkhawm leh State dang tam takin an tih theih loh session tluang taka an zo thei chu lawmawm a tih thu a sawi a. Session chhung zawnga member te thahnem ngai taka ram leh hnam tana tha leh zung, rilru leh ngaihtuahnate hmanga thawhhona hian rah duhawm tak chhuah ngei tura a beisei thu a sawi a. Member te ram leh mipui tana inhnial bawrh bawrh awm mah se, pawn lama khakna leh inhuatzui awm lo thin hi lawmawm a tih thu leh entawn tlak a nihna a lang thin niin a sawi.
Lalrinliana Sailo hian, session tluang taka neih a nih theihna atana a bik takin Finance department te chu fakin, Mizoramin G-20 a thlen dawn avanga ram hlimthla te a hril dawn avangin official te an ngen angin chawpchilh taka peihfel hman a ni a. Kum 50 chuang Mizoram Legislative Assembly neih a nih tawh hnuah, vawi khatmah February thlaah budget session zawh a la awm ngai lo tih sawiin, Finance changtu chief minister Zoramthanga leh department-a a thawhpuite chungah lawmthu a sawi a. Chubakah, venhimna kawnga thawktu Police te leh health department te bakah, Assembly Secretariat chungah lawmthu a sawi bawk.
Assembly Speaker hian, Mizoram Legislative Assembly-in Golden Jubilee a lawm tawh a, tun tum budget session hi zawhna luh tam ber kum niin, zawhna zawng zawng hi 1529 lutin record a nih thu a sawi.
Speaker in a tar lan danin, budget session neih zawh takah House-a chhan tur (starred question) 1160 a lut a, he’ng zingah zawhna 1152 pawm niin, zawhna hnawl pariat a awm.
Ziaka chhan chi (unstarred question) 369 lutah pawm zat 365 niin, hnawl zat pali, starred atanga unstarred-a leh zat 693, chhana dawn loh 43 a awm bawk.
House dawhkana lehkha pawimawh pharh zat hi 41 niin, chief minister Zoramthanga, Deputy CM Tawnluia, Minister R Lalthangliana, Minister Lalchamliana, Minister R Lalzirliana, Minister Lalchhandama Ralte, Minister Er Lalrinawma leh member Dr ZR Thiamsanga-te pharh a ni.
List of Business-a dah zat hi 260 niin, House-a chhan zat 64, chhan hman loh 195, hnukkir leh pathum, house-a hnuhkir pakhat, chhanna dawn loh 59 a awm a ni.
Tun tum session chhung hian sorkar bill paruk a lut a. The Mizoram (Restriction on use of Transferred Lands) (Amendment) Bill, 2023; The Sinlung Hills Council (Amendment) Bill, 2023; The Mizoram Scheduled Tribes and Scheduled Castes (Regulation of Issuance and Verification of) Community Certificates (Amendment) Bill, 2023; The Indian Stamp (Mizoram Amendment) Bill, 2023; The Mizoram Appropriation (Demand) for Grants 2023-2024) Bill, 2023 leh The Mizoram Appropriation (Supplementary Demand For Grants 2022-2023) Bill, 2023 te niin, pawm vek a ni.
Dr Vanlalthlana put luh private member bill ‘The Mizoram Land (Revenue) Amendment, Bill, 2023 chu sawi ho a nih hnuin, voice vote hmangin Select Committee-a ngaihtuah tura dah a ni.
Private member resolution 86 dawn a ni a, pawm vek a ni, resolution pahnih te hi sawiho niin adopt a ni a. Chungte chu Zothantluanga put luh ‘Mizoram sorkar kal meka sport infrastructure din kawnga hmasawnna nasa tak neih hi lawmawm kan ti,’ leh Lalchhuanthanga put luh ‘Kawngpui tha leh building tha kan neih theih nana tun aia uluk takin hna thawh ni rawh se,’ tihte hi voice vote hmangin adopt a ni a. Lalrindika Ralte resolution ‘Kan ram thenawmte atanga sahimna zawnga rawn raltlante hi kan sorkar hian an awmna tur siamsakin duat takin enkawl se, awmkhawmna tur hmun bik ngaihtuah sak rawh se’ tih chu ‘Kan ram thenawm Mynamar leh Bangladesh atanga sahimna zawnga kan unau raltlana lo kal te Mizoram sorkar leh Mizoram mipuite’n tha taka kan lo dawngsawng hi a lawmawm kan ti a, a tul ang zela tuamhlawm chhunzawmin an awmna tur leh an mamawh te ngaihtuah zel nise kan ti,’ tiin amend a nih hnuin adopt a ni.
Finance changtu chief minister Zoramthanga hian The Annual Budget for the year 2023-2024 leh Supplementary Demand for Grants for the Year 2022-2023 leh a kaihhnawih paper te a pharh a, lungrual taka pawm niin, Home minister Lalchamliana’n Uniform Civil Code duh lohna official resolution pu lutin, sawiho hnuah pawm a ni a. District Council & Minority Affairs department changtu R Lalzirliana’n February 23, 2023-a Autonomous district Council te tana direct funding chungchangah speaker a dil angin statement a siam bawk.
February 8, 2023 khan Lawngtlai East bialtu MLA H Biakzauva chu chuhtu awm loin Deputy Speaker atan thlan tlin a ni a. Deputy Speaker thlan chungchangah Speaker chuan eptu party a fak.
Session chhung hian House member lo ni tawh pathum – Lalhmingthanga, R. Khawpuitanga leh R. Lalrinmawia te sun niin, House Leader Zoramthanga’n chanchin tawite sawiin leh sun thu a sawi hnuah, member pariat Zodintluanga Ralte, Lalduhoma, Vanlalhlana, KT Rokhaw, Minister Lalchamliana, Minister Dr R Lalthangliana, Minister Tawnluia leh Dy Chief Whip Lalrintluanga Sailo te’n sunna thu an sawi.
Assembly Speaker hian session titawpa a tlangkawm hmain, L Thangmawia chu doctorate degree hmuh hmaa Associate profressor-a kaisang a, MLA ni laia PhD a hmu chu thil lawmawm leh danglam tak, thangthar te, House leh member-te tana chona a nih thu a puang bawk.