Aizawl : MPCC PAC member John Rotluangliana chuan chief minister-in Mizoram leiba a engto lo chu Mizo mipuitete a zah lohna a nih thu a sawi.
MPCC Campaign Committee-in zinchhuah programme a duan anga thawhtannia Dampa East block a tlawhnaah thu sawiin John Rotluangliana hian, “Kan state budget pharh mek hi vaibelche 14000 vel a ni a, kan leiba zah chu vaibelchhe 13000 vel a ni a, chuti chunga kan chief minister in Mizoram leiba hi ka engto lo a ti chu sum enkawl thiam loh lam pawh a ni lo, Mizo mipuite min zahlohna zawk a ni,” a ti.
John Rotluangliana hian MNF sorkar kalmek hian Mizo mipuite min zahpahna nei miah lovin ro an rel mek nia sawiin, “Kum nga dang ro an rel leh chuan Mizoram hi chenna tlak lohah a chhuah mai a hlauhawm,” tiin a sawi a. Mizoram mipuiten an enchhin tawh, Mizoram chhunga hmasawnna ruhrel zaa 80 zet hnutchhiah theitu Congress lo chu innghahna tlak party a awm lo niin a sawi.
MNF kaihhruai sorkar chu kil tinah a hlawhchham a ni tiin an beidawngin Assembly House ah pawh dawt an sawi hreh tawh lo a ni, John Rotluangliana chuan a ti a. ZPM ten Mizorama sorkar lo awm tawhte’n engmah thawk lo anga an sawi hi chu thu dik lo hulhual, awmlo atanga lo awm ve, tam inti ringawt thu vuakthluk mai niin a sawi.