Greece-a rel pahnih insu-ah mi 36 vel thiin mi tam tak an inhliam bawk tih tual chhung thuneituten an sawi.
Chhiatna hi ram lailia Larissa khawpui daia Thawhlehni zan tlai tawh taka thleng a ni a. Passenger phur chi rel, an khawpui, Athens atanga Thessaloniki pana tlan leh hmar lam khawpui atanga tlan bungraw phur rel chu an insu a ni.
Passenger chuanna pindan thenkhat chu puakin a kang hluah hluah a ni.
Rail operator Hellenic Train chuan passenger train-ah hian mi 350 chuang an chuan thu leh zan dar 7:22 (India-a Nilaini zing dar 1:52)-a Athens chhuahsan a nih thu a sawi.
Mi 66 velin hliam tuarin an zinga paruk chu intensive care-a dah ngai an ni a, hliam tenau tuar mi 250 chu bus hmangin km 130 chuanga hla, Thessaloniki-ah phurh thlen an ni tawh bawk.
A bul hnaia damdawi inte chuan kang hliam eng emaw zat an enkawl a, ambulance thahnem tak chhawp a ni bawk.
“Thil puak ring tak kan hria a, second 10 vel chhung chu hrehawm tak a ni,” tiin passenger pakhat, kum 28 mi, Stergios Minenis chuan a sawi a. A chuanna pindan chhe kar atangin himin a zuang chhuak a ni.
“Kan lam tukverh delh zawnga kan awm thleng kan pindan chu a inlet kual a, kan zavaiin kan chiai hle a, hrui (cable)-te chu hmun tinah a kang a, a kang nasa tih kan hmu a, kan ding leh veiah a kang hluah hluah hlawm a ni,” a ti bawk.