Mizoram State Health Care Scheme (MSHCS) hnuaiah damlote inenkawlna senso bill ba, la pek loh Rs vaibelchhe 65.90 a awm mek.
Budget session neih zawh taka Aizawl North II bialtu MLA Dr Vanlalthlana zawhna ziaka chhan chi chhangin Finance Minister Zoramthanga’n kumin January 5 thleng khan state health care scheme hnuaiah bill ba Rs 65,90,84,982 a awm a, chungte chu mi 23,462-te bill a nih thu a tar lang.
Finance minister-in a tar lan danin October 1, 2020 atanga September 30, 2021 chhung khan damlo inenkawlna senso bill thehlut mi 28,887 awmin an zinga 27,988-te chu bill pek kim an ni tawh a, mi 899-te erawh bill pek an la ni lo thung.
October 1 atanga March, 2022 chhung khan healthcare hnuaiah damlo inenkawlna senso bill thehlut mi 12,751 an awm a, chung mite chu bill la pek loh vek an ni a, policy year kal mekah inenkawlna senso bill thehlut mi 9,812 awm tawhin, heng mite bill pawh hi la batsak vek an ni.