India hmarchhaka state pathum – Meghalaya, Nagaland leh Tripura-a tun hnaia assembly inthlana vote tlate chu Ningani hian chhiar a ni dawn.
State pathumah hian bial 178-ah vote thlak a ni a, February 16 leh 27 khan vote hi thlak a ni.
Election Commission of India (ECI) thu angin zing dar 8:00 atangin chhiar tan a ni dawn a. Nagaland-ah bial 60 awmin bial khat, Akuluto-ah chuan BJP candidate chu mi dang chuhtu an awm loh avangin tlinga puan a lo ni tawh.
Meghalaya-ah pawh bial 60 tho awmin bial khatah chuhtu pakhat chauh awm chu tlinga puan niin bial 59-a vote tlate chhiar a ni ang a. Tripura-ah erawh bial 60 awma vote tlate chhiar vek a ni ang.
Tripura-ah hian Communist Party of India (Marxist) chuan kum 30 chuang zet ro an rel hnuah kum 2018 khan BJP-in an paih thla a. Inthlan hnuhnung berah hian a hma zawnga MLA pawh nei ngai lo, BJP hian bial 36 zet an la a ni.
CPM chuan bial 16 changin eptu party lian ber, Congress chuan MLA an nei zo lo thung a. BJP hian chief minister atan Biplab Kumar Deb an dah hnuah tunah hian Manik Saha chu an nihtir mek tawh thung.
Meghalaya-ah Conrad Sangma chu chief minister a ni mek a, ani hi National People’s Party (NPP) chief niin tun tumah hian thawhpui nei lovin inthlan hi an chuh.
Tuna sorkar term liam turah hian BJP nen Meghalaya Democratic Alliance tia hming invuahin sorkar intawm an siam mek a ni.
Nagaland-ah BJP leh Nationalist Democratic Progressive Party (NDPP) chuan kum 2018 khan sorkar an siam a. Party pahnihte hi Janata Dal (United) leh independent MLA ten an thlawp bawk a, Neiphiu Rio chu chief minister a ni mek.
BJP AN LANGSAR
Exit poll hrang hrang atanga a lan dan chuan tun tum inthlan atang hian BJP chuan hmarchhakah hnuhma an neih belh ngei hmel a, Tripura leh Nagaland-ah chuan sorkarna siam khawpa chak tura dah niin Meghalaya-ah pawh inthlan hmasa aia vote-tu ngah ngei tura ngaih an ni.
Nagaland-ah hian BJP hian a thawhpui, NDPP nen sorkarna an siam leh ngei rin a ni a. Tripura-ah phei chuan thawhpui nei lo pawhin anmahni pualin sorkar an siam theih rin a ni a, Meghalaya-ah chuan tun term kal meka MLA pahnih chauh nei mek chu pasarih an neih tlin tawh rin a ni bawk.