Iran-ah November atang khan hmeichhia 650 vel zet boruak tha lo hmanga beih an ni tawh a, mi tam tak chuan sikul khar a nih theih nana hma an lakna niin an ngai.
Tumah thi an awm lo va; mahse, thawk buai, luak chhuak, khaw hmu fiah lo leh taksa zawia awm phah an awm nual.
Deputy health minister chuan Pathianni khan, “Mi thenkhatten sikul, a bikin hmeichhe sikul khar an duh tihlanna chiang tak a ni,” tiin a sawi a; mahse, a hnuah a thu sawi hi a sut leh.
Prosecutor general chuan kar hmasa khan chhui chianna tur thu a pe tawh a, tuna an hriat chinah chuan sikul khar duhna lam aiin ‘pawikhawihna pangngai’ a ang zawk tih a sawi.
Hetih lai hian vantlang erawh an thinrim hle thung.
Tun thla tir lamah khan Qom-ah hian governor pisa tualah hetiang a thleng duh lohna hi mi 100 bawr velin an lo lantir tawh.
Social media-a video thehdarh nasat tak pakhatah chuan pa pakhatin, “Ka fate himna tur hi min ngaihtuahsak ngei ngei tur a ni! Fanu pahnih ka nei,” tia a au lai a lang a. “Fanu pahnih ka nei a, ka tih theih chhun chu sikul kaltir loh hi a ni tawh mai,” a ti.
“Hei hi indona a ni,” tiin hmeichhe pakhat chuan a sawi a. “Qom-a hmeichhe high school-ah hetiang hi an ti a, ina awm tura min nawrna a ni. Hmeichhiate hi ina awm turin min duh a ni,” a ti.
Nu leh pa thenkhat chuan an fate chu chawlhkar chuang daih damlova an tluk thu an sawi hlawm.