- Ruata
Mahindra chuan Scorpio Classic variant dang a rawn dah belh leh dawn a. He variant hi Classic S5 tia koh a nih a rinawm a, Classic S leh Classic S11 trim inkarah a thu dawn a ni.
Mahindra Scorpio
Mahindra Scorpio hi chu Mizo te chuan kan hmelhriat pawl tak tur SUV a ni a. A chhuah tirh phat atangin Mizoramah hi chuan Mahindra company dealership hlun tak awmna a nih avangin lirthei lei hlawh tak leh man to pawl a ni char char a. Tun thlengin Mahindra Scorpio hi mimal leh sorkar bakah company leh midang hrang hrangin an lei tam ber pawl a la ni reng a ni.
Mahindra Scorpio N
Tunhnaiah khan Mahindra Scorpio hi a chi thar hlak Scorpio N tih hming pu a rawn chhuak a. Hei hi chu hman atanga Mahindra Scorpio lo chhuak chho char char tawh te nena khaikhin chuan design pawh dang hlak a ni a. Tunhnaiah miin an lei nasa viau a, dealer kaltlanga book tute pawhin India ram pumah rei tak tak a thar nei turin an nghak mek a ni. A nghah chhung ‘waiting period’ rei ber pawl lirthei a ni a, hemi awmzia chu an chhuah tirh phat atangin lei tum an tam vang a ni a. Market lamah pawh a che tha chho viau a, he Scorpio tharah hian 4×4 system pawh tha tak a awm.
Scorpio Classic
Mahindra Scorpio N chhuah hnulawkah hian a hmaa Scorpio design hlun tawh tak, tunah pawh la nalh tak duhtute tan Scorpio pangngai chu a thar tihchhuah leh a ni a. A thar a ni na a, Scorpio tih hming kan lama kan mitthlaa lang nghal ang, a design kan hmu nasat ber design kha danglamna tam lutuk loin an tichhuak a, a hmingah chuan Scorpio Classic tih an rawn put tir ta thung a ni.
Mahindra Scorpio Classic S5: eng nge a hmuh ang?
Scorpio Classic S5 tih hming pu tura beisei Scorpio Classic chi thar tur hi seating configuration pathum neia siam a nih hmel a, hengte hi mi 7 thut theihna bench type seat, mi 7 chuan theihna captain seat awm tel leh mi 9 chuan theihna 7-seater captain chair leh bench seat type duhthlan tur awm te a awm dawn a ni. Tunah hian variant dangte hian heng seat configuration duhthlan tur pathum zinga pahnih chauh hi duhthlan tur an nei a, hei hi a variant a zirin a danglam a ni. Hei hi report thenkhat chuan a danglam tawh ang a, Classic S11 -ah pawh mi 9 chuan theihna seat configuration a awm maithei tawh bawk a ni.
Mahindra Scorpio Classic S5 khawl
A khawl lamah chuan Scorpio Classic S5 hian Gen 2 mHawk khawl a nei ang a, 2.2-litre turbo-diesel engine 132hp power leh 300Nm torque pe chhuak thei a ni a. 6-speed manual gearbox a nei bawk ang a, a hnung ke phih kal (rear wheel drive) a ni dawn a ni. Scorpio Classic hian automatic gearbox emaw 4×4 system emaw a nei lemlo a ni.
A man
Tunah hian Mahindra Scorpio Classic hi Rs Nuai 12.64 – 16.14 (ex-showroom, Delhi) inkar man vel a ni a. Classic S5 variant thar hi cheng nuai 14 vel man tura beisei a ni a, Classic S leh Classic S11 inkarah a awm ang a, tuna chhuak mek Model awmsa te hi thla 5-6 vel nghah a ngai thin a, lei tur pawhin nghah lamah taihmak a ngai viau a. Lirthei tha leh demand pawh sang a ni tih hei hian a tichiang awm e.