Aizawl : Hachhek bialtu MLA Lalrindika Ralte in Taitesena Group YMA Conference Vawi 35-na chu nimin khan a hman pui a, ram leh hnam humhalh tih hian chhungkua, nupui pasal fanaute leh khawtlang tana rinawm a ken tel thu a sawi.
W. Bunghmun khawmpui hmanpuitu bialtu MLA hian chhungkua, nupui pasal fanaute leh khawtlang tana rinawm hi ram leh hnam humhalh hian a keng tel tih a sawi a. “Mipa hi chhungkaw mawhphurhna latu tur an ni a. Ram leh hnam tana mawhphurtu tur kan ni,” a ti.
Lalrindika Ralte hian, Pathianin mipate hi chhan neiin thahrui a pe a, heihi chhungkua leh ram tan a ni a nih thu a sawi.
Chapona hian a neitu a tichhe thin a, he khawvelah hian chapo pui tlak khawpa dinhmun tha a awm loh thu sawiin, “Mi aia kan dinhmun emaw kan thiamna alo sang deuh anih pawhin chapopui tur niloin, midang tana malsawmna kan nihna tur a ni, rawngbawlna tur a ni,” a ti a. Mizo tawng chiah thiam hian a hausak theih a, a ropui theih tih a sawi a. “Pathian hian sap a ngaihpawimawh ang tho hian he hnam hi a ngaipawimawh. Kristian nih a, Mizo nih a Mizo tawng chauh thiam chung pawh hian a dinchhuah theih,” a ti bawk.
Taitesena Group YMA ah hian Branch 15 a awm a ni.