Peru-a police chuan Puno-a hman lai hmun hlui pakhatah thil chah vel dah kualtu (delivery man) ip atangin mummy an man.
Rui tak anga a awm chu ringhlelin an dap a, a ip (cooler bag) chhungah hman lai ruang, tawih theih lova siam a lo ak tih an hmu chhuak a ni.
A sawi dan chuan puana tuam mummy nen hian pindan khatah an awm a, ‘a thlarau lam bialnu’ anga a ngaih thu leh ak chhuakin a thiante hmuh a tum niin a insawi.
‘Juanita’ tia a hming a vuah mummy hi a pindanah, TV bula bawmah a hung a. A pa ta a nih thin thu leh engtin nge a pa hian a neih theih tih erawh a hre lo.
Mi thiamte chuan mummy an mansak hi kum 600 atanga 800 inkar vel a nih a rinawm thu an sawi a. An mansak hian hmeichhia angin ngai mah se mipa zawk niin an sawi bawk a. Mipa puitling kum 45 chuang, metre 1.51 (4ft 11)-a sang niin an sawi bawk.
Mummy hi bandage varin tuam a ni a, heng lai hmuna Hispanic hun hma lama an inphum dan thin angin a tawmin a taksa chu a awm a ni.
Peru-a cheng hmasa hnamte hian Spanish-in an awm hma khan tawih thei lova ruang sawngbawl hi an ching hle a. Mummy thenkhat chu phum an ni a, thenkhat erawh lang theia dah niin kût thenkhatah phei chuan kawng an zawhpui thin.
Police chuan mummy hi laksakin an rama thil hlui vawngtu, culture ministry hnenah an hlan.
A lo kawltu leh a thiante pahnih, kum 23 leh 26 inkarte chu hren an ni a, Peru ram thil hlu vawn dan bawhchhia an nih theih avangin chhui zui mek an ni.